Sunday, January 4, 2009

صباح الفيس بوك


سلام عليكم .. اولا بعتذر انى بقالى فترة مش بكتب مشاغل والله مشروع التخرج
وامتحانات ميد تيرم يعقبها تيرم يسبقه مذاكرة
وها انا الان فى تلك المرحلة المشئومة المهم انى جيت ...

صباح الفيس بوك ..مساء الفيس بوك ..ديسكاشن سعيد يا حضرت ...
فيس بوك فيس بوك
انا عارفة ان كل الناس اتكلمت فى الفيس بوك
بس اصله مش مستاهل هو مش ظاهرة
الحكاية كلها انى حابة اسأل سؤال هل نقدر نعتبر الفيس بوك درة بلوجر
..بمعنى
خلاص ..راحت على المدونات ؟؟
انا عن نفسي لا اتشبث بأى وسيلة سواء قديمة او حديثة
المهم الغاية والسؤال هنا للجميع
وبالأخص المدونين هل حقا سد الفيس بوك وجروبات
الفيس بوك الغاية من المدونات ؟؟
انا لا استنكر ولا أقر انا بسأل لأنى لاحظت ان الفيس
بوك اكتر فاعلية بس حسيت ان بلوجر
بيتيح امكانيات اخراجية وتصميمات أفضل مش
عارفة قلت ادردش مع اصحابي المدونين
..
اللى شكلهم نسيونى بما انى بقالى كتير مش
بكتب ... وبما انى عودتكم فى تدويناتى
ان خير الكلام ما قل ودل
اذا ..خلص الكلام
ومستنية ايجاباتكم يا تري خلاص ارفع تدوينة الاعتزال واعزل من هنا ؟؟

13 comments:

AbdElRaHmaN Ayyash said...

بصي يا فندم
نقدر نقول ان الفيس بوك يعتبر المرحلة التالية للمدونات
منقدرش نقول ان المدونات قضت على المنتديات .. لكن سحبت منها زخم كبير اوي
و نفس الموضوع بالنسبة للفيس بوك
هو وفر حاجات مش موجودة على المدونات و في نفس الوقت سحب الخصوصية من المدونات
كل حاجة مفتوحة لكل حد
له مساوئ .. لكنها مش هتخلليه يقف عن التطور و الاستمرار

jessy88 said...

تمام كدة فعلا بس فعلا لازم نحاول نطور نفسنا منتمسكش بالماضي لمجرد الوفاء ولا ايه ؟

walaa rizk said...

اول زياره

وموضوع حلو جدا

بالنسبه لوجهه نظرى

لا طبعا مش هيحل محل المدونات
المدونات روح تانى

انا بستخدم الاتنين

لكن لا أجد روحى فى الفيس بوك نهائى
بصراحه

قد يكون رآيى الشخصى

ولكن عامه

هو ليه دوره الرائد فى نشر اى قضيه محتاجين نفعلها ليه فائدته مؤكد

ولكن بحس ان المدونات بيت كل واحد بجد

ومش موضوع تمسك بالماضى

المدونه ليها ذكريات مع كل واحد فينا

اول بوست او تعليق مين كان السبب فى دخولك هذا العالم كده

لكن ممكن ف يوم تتطلع حاجه احسن منهم الاتنين

بوست متميز

jessy88 said...

عاشقة الاقصي
انا رأيى من رأيك برضه بس تقدرى تقولى وقت التصفح على الفيس بوك او اى شبكة تانية اخد من وقت تصفح المدونة شوية وشرفتينا

MaNoO said...

لا بصراحة انا بشوف ان جمهور المدونات يختلف تمام عن الفيس البوك اللى قادر اقول عليه انه موقع شعبى ودا مش عيب بس كمان الشعبى بياخد كل المستويات انما المدونات بعتقد ان مش اى حد يكتب فيه ولا يرد ويتكلم خاصة فى الفترة اللى احنا فيها دى كمان الفيس بوك مهما انا عن نفسى بعتبره مجرد تضييع وقت او عادة يومية انما المدونة عندى مكان ممنوع الاقتراب او التصوير الا للى يستحق فعلا

وعشان كدا اقولك انا مش ممكن استغنى عن المدونة حتى لو فى 10 فيس بوك

تقبلى مرورى المتواضع

Mai Nagib said...

أنا رأيي ان المدونات ابقى لأنها نافذه تعبير أوسع من مجرد الاشتراك في جروبات رغم ان الفيس بوك اكثر فاعليه لكن يبقى لكل منهما مذاق مميز ولا يحدث أبداً أن تلغي نافذه أخرى لأن لكل منهما جمهوره الذي ربما يكون مشترك في كليهما او في أحدهما
حمد الله على سلامتك يا ياسمين ووحشتنا موضوعاتك المميزه
يلا ان شاء الله اجازه سعيده مليااااااانه بوستات وجروبات فيس بوك كمان

Anonymous said...

حملة مقاطعة الفن الهابط
بسم الله الرحمن الرحيم

الحملة عبارة عن مقاطعة تامة للسينمات ليه بقى ؟
احنا عمالين نشتكي من القذارات الي بنشوفها في الافلام و الموضوع بيتحول من سىء لأسوأ .. و بنشتكي من الوضع الغريب الي يخلي واحد ممثل هايف مليونير و آلاف الخريجين من طب و هندسة و غيرهم مرتباتهم ملاليم دا لو لقوا شغل أصلا ..
الطبيعي اننا بنلوم الحكومة كالعادة على الوضع دا .. بس لأ المسئولية الأكبر علينا احنا مش على الحكومة !!
لأن الموضوع عرض و طلب .. المنتجين بيعملوا الأفلام بالشكل دا لأننا عايزين دا و لأننا بنروح السينمات و بندفع . لو فكرنا في الموضوع دا هنحس بإهانة كبيرة قوي لينا !!
عشان كدا لازم نغير الوضع دا بإدينا و نقول لاااااا للإباحية .. لا للفن الهابط .. لا للهيافة .
خلينا نبقى عمليين و نحسبها .. لو افترضنا متوسط دخول السينما للواحد مننا مرة واحدة شهريا و بيدفع فيها 20 جنيه
يبقى لو وصلنا ل 100000 عضو في الحملة مقاطعين السينما يبقى احنا بنخسرهم شهريا 2000000 ( 2 مليون جنيه) .
و على الأقل قوي نبقى وصلنا صوتنا وعملنا الي علينا ..
و مطالبنا فن محترم , يحترم عقلياتنا و قيمنا و ديننا
خليك ايجابي متقولش "هو جت عليا يعني ماهو ناس كتير بتروح السينما"
ايوة على الأقل عملت الى تقدر عليه .

مهم جدا: قبل ماتنضم للحملة وتقاطع السينما لازم الأول تكون رافض الافلام دي من جواك ... يعني لازم تكون مش عايز الافلام دي بجد و عايز فن محترم و هادف .
و افتكر : "إن الذين يحبون أن تشيع الفاحشة في الذين آمنوا لهم عذاب أليم في الدنيا و الآخرة والله يعلم وأنتم لا تعلمون


http://www.facebook.com/home.php?ref=home#/group.php?gid=44104217671&ref=ts

semsem said...

الاول صباح الخير يا جيسي
عاملة ايه
وحشني كتاباتك والله
اما بالنسبة للراي فانا بصراحة شايف ان المدونات هي العالم الحقيقي اللي الواحد يقدر يخرج فيه كل حاجة هو عاوز يقولها بشكل جميل ويلاقي ناس يستقبلوا كلامه ده ويفيدوه وده عن تجربة شخصية وجايز انتي كنتي واحدة من الناس دول
بس انا حقيقي حياتي فى المدونة اجمل بكتير من حياتي على الفيس بوك
مع تحياتي
سمسم

محمد شوشة said...

بما اننا احسن ناس تلقى خطب عصماء

فكنت قلتلك سابقا ان الفيس بوك ليس بديلا

لكن فعلا اكتشفت انه صار كل حاجة

انا عن نفسى يادوب بفتكر المدونة احيانا

وحتى لما بفتكرها غالبا بنزل لينكات مش كتابات

أسما عواد said...

انا بالنسبة ليا المدونة أبقى
على فكرة لغاية دلوقتي انا موش فيس بوكية
بالرغم من الحاح اصحابي لأكون كذلك

تحياتي وشكري

دعـاء عـلى said...

انا بحب الفيس بوك و بستخدمه كتير لكن مش شايفه ابدا انه بديل عن المدونه
الفيس اولا بيبقى مجرد بروفايل مش بتحسى انه مكان ليكى لوحدك ثانيا البروفايل ده بيتحدث علطول و كلامه لحظى و بيتنسى بسرعه
انما المدونه انا بعتبرها دفتر احلام واسع بكتب فيها كل اللى عايزاه يعيش و ما يتنسيش و اللى عايزه انى افضل فاكراه
و فعلا بلاقى فيها روحى و بتفرق معايا كتير
اوعى تعزلى من هنا صدقينى هتخسرى كتير (:

زهرة said...

الفيس بوك مختلف تماماً عن المدونات
لإن الفيس بوك مجتمع مفتوح شوية مع وجود كل الخصوصية اللى موجودة دلوقت

وكمان بيمتلك مميزات ومساؤى تختلف مع المدونة
المدونة دى صحيفتى اليومية
أما الفيس بوك .. وسيلة مفيدة أحياناً ممكن أستخدمها وممكن لا
بحييك على طرح السؤال لإنة مهم

Anonymous said...

Do you have a spam issue on this site; I also am a blogger, and I was wondering
your situation; we have developed some nice methods and we are looking to swap strategies with other folks,
be sure to shoot me an e-mail if interested.
My web site: funnymariogames