Wednesday, September 24, 2008

أنسان وشوية اسئلة



أنا مين ؟ أنا فين؟ أنا ليه؟ انا ازاى؟ انا أمتى ؟؟!!!! أسئلة طرحها الضيف احمد فى أحد الأفلام التي كان يجسد بها دور مجنون ...غريبة مع ان تلك الاسئلة لا يسألها الا أعقل العقلاء بل على العكس.. فمن يمكنه ان يعيش وهو لا يعلم لماذا وجد وأين وكيف ومتى ومن هو ؟؟ ما هى صفاته ..ايجابياته ..سلبياته ..دوره فى الحياة ؟؟ حقا كيف يمكن للانسان ان يشعر بمعنى الحياة اذا كان لا يعرف أجابة تلك الاسئلة ...ظاهرة غريبة .. داليدا واليا ابو ماضي وغيرهم من الذين غنوا و كتبوا الكثير عن الحياة والتفاؤل انتهت حياتهم بالاستقالة من الحياة ..بالهروب...بالانتحار !!
كيف؟؟ لم اجد اجابة لهذا السؤال سوي انهم لم يجدوا سببا يعيشون من أجله لا يعنى كونى فنان مشهور او مرموق اننى وجدت سببا أعيش من اجله لأن الفن لو لم يكن لرسالة لما كان سوي ا تعبيرا ورسم للواقع بعين المبدع وهذا ليس سببا أعيش من اجله هذا ليس تحقيرا من شأن الفن ولكنه توضيح واكرر ذلك لمن يمارس الفن بلا رسالة ...انا عايش ليه؟؟؟؟ انا ربنا خلقنى ليه؟؟؟ ويبقي حلو اوى لو السؤال الاخير سئل بتلك الصيغة اقصد لو السائل كان يعلم ان له خالق وان الله هو من خلقه لأنه بكدا بيوفر على نفسه نصف المشوار ...شباب كثير عايش من غير ما يعرف هو عايش ليه ...خروجة وبنت حلوة وشغلانة كويسة تجيب فلوس كتير عشان برضه يعرف يخرج خروجة حلوة وعشان برضة يبقي شيك وجذاب وتنجذبله البنت الحلاوة أو فى حالة انه شاب اكثر جدية .. شاب يعيش بنظرية الرجل العادى بيجيب مجموع عشان شكله قدام الناس ... يدخل كلية مرموقة حتى لو مكنتش طموحه اللى ممكن بكون متاح امامه لكن شكله وبرستيجه يحكم ...ابقي جايب مجموع سياسة واقتصاد وادخل علوم ؟؟؟ ابقي جايب مجموع صيدلة وادخل السن؟؟؟ والنتيجة نخسر مترجم محترم وعالم فاذ عشان البريستيج ...من يفعل ذلك مؤكد انه لا يعرف لماذا يعيش وعلى ذلك تكون حياته ... زوجة لأنى لازم اتجوز ...وأبناء فى مدارس لغات حتى ان كنت لا اشجعها بس اصل العيلة كلها فى مدرسة لغات اشمعنا ابني وما الى ذلك من ظواهر الحياة العشوائية التى تفتقد المبدأ والهدف نعم لابد ان يكون هناك مبدع وغير مبدع وغنى وفقير وذكى وقليل الذكاء ولكن ماذا لو عرف كل من هؤلاء لماذا خلق؟؟ لماذا وجد ؟؟ المشكلة ان تلك الاسئلة التى توفر على بنى ادم الكثير من الوقت والجهد والتفكير لا يسألها العقلاء وان قلنا اننا بمقتضي هذا الفيلم نقر أن من يسألها لا بد ان يكون مجنونا ..اذًا أين السألين؟؟ اظن أن مصرنا فى عصرنا الحالى بها عدد لا بأس به من المجانين !!!
وعامة سواء القارئ عاقل او مجنون او نص نص ... ارجوه ان يغلق المدونة بعد قرأة هذه التدوينة ويردد فى كل فخر بدون خوف ولا خجل من الضاحكين والضاحكات والساخرين والساخرات ...انا مين ؟؟ انا فين ؟؟ انا ليه ؟؟انا ازاى ؟؟انا امتى؟؟!!!

17 comments:

semsem said...

بحجز اول تعليق وبرجع بعد ما اكمل البوست
ميرسي مقدما

semsem said...

بعد ما قريت البوست وفهمته كويس وقريته بدل المرة اتنين وتلاتة دلوقتي اقدر اعلق
فى البداية ميرسي ليكي على هذا الطرح اللي بجد ممكن يكون صورة موضحة غايبة عن ناس كتير فى زمانا ده
اسف لو كنت هطول بس الموضوع شدني واتمنى انك تسمحيلي بده
زمان كنت ببص لاصحابي نظرة اني نفسي اكون زيهم لا ناعي للدنيا هم ولا فى دماغي عايش اليوم بيومه وبقضيها وكان نفسي ابقى زيهم
لكن للاسف مقدرتش وكنت دايما بفكر انا رايح على فين انا ايه حالي انا ليه مش كويس وان فرحت لامتى هفرح وان زعلت ليه زعلت وايه السبب ومين جرحني ومين فرحني مين صاحبي وهكذا
مضيع نص حياتي فى التفكير فى الدنيا اللي حواليه لغاية ما ربنا هداني على فكرة الكتابة ومن بعدها التدوين والمدونات
جايز كل كلامي بعيد عن موضوعك بس انا عندي كلام كتير كالعادة مش هيساعه مجرد كومنت اسيبه على البوست بتاعك
بس انا هبدا فى اني اكتب حاجة تخص موضوعك وادعوكي انك تبقى تفوتي تقريها
وللمرة التانية والتالتة والعشرة كمان بحييكي على اسلوبك وكتاباتك وبتمنى منك انك مش تغيبي بين البوست والتاني لاني مستني كل جديد
حسام

محمد فاروق الشاذلى said...

كثيرين هم الذين يحيون بدون هدف ولا مبرر وقليل منا من يعرف لماذا وجد فى هذه الحياة وكيف وحتى هؤلاء قد لايعيشون من أجل هدف سامى.
تركيبة الإنسان تجعل محاولة فهمه صعبة ومحاولة إفهامه أصعب.

تقبل تحياتى

محمد شوشة said...

السلام عليكم
اولا لو اللى بيسأل السؤال ده مجنون
فالحمد لله انا عاقل
يبقى ليه أسأل نفسى الاسئلة دى
هههههههههههههههه

son's egypt said...

السلام عليكم
فعلا هو الواحد عايش ليه
عايش علشان هدف ورسالة ولا عايش علشان مجرد عايش وخلاص
احنا فين من الحياة والدنيا اللي واحد عايش فيها
لكل واحد له رسالة عايش علشانها
ولكل واحد طموح
علشان تحقق طموحك اعرف انت عايش ليه ولمين

jessy88 said...

s-g-s:
انا سعيدة اوى انى قدرت افيد حد بالبوست دة يا ريت كل اللى يقرأه يهتم بيه ويفكر فيه زيك كدة
شكرا على زيارتك وعلى فكرة كويس انك حجزت تعليق لأن العدد كان قرب يكمل بس انت لحقت على اخر لحظة

jessy88 said...

قلب مصري:
مهو دة اللى مزعلنى وهو دة اللى خلى ربنا يقول فى سورة عبس (كلا لم يقض ما امره)بس احنادورنا اننا نوعى الناس واذا لم تكن تلك الأسئلة تطرق اذهانهم فلنخبط بها نحن اذهنهم
شكرا على مرورك الكريم

jessy88 said...

عربي اعيش فى مصر:
يا لهوى على خفة دم الشعب المصري بتتهرب من الاسئلة ؟؟عموما انت تروح من مصر فين مسيرك تتجنن وساعتها ابقي دور على حجة بقي يا ناصح

jessy88 said...

sons egypt:
عليك نووور يا ابن مصر والله مصر لسه بخير ...نورت المدونة وشكرا على تعليقك

Egyptian citizen said...

انا شوفت الفيلم اللي بتتكلمي عنه تقريبا عروسة النيل
يمكن الناس بطلت تسئل الاسئلة دي
و قبلت بالحقيقة انهم موجودين في الحياة
و لازم يعيشوها لانهم هينداسوا لو وقفوا عند التفكير في الاسئلة دي
و عموما وجود الله في حياة الانسان
هيشعره بالامان و مش هيخليه يسال اسئلة زي دي
بجد موضوعك جرئ جدااا و افدني كتير
شكرا

jessy88 said...

egyptian citizen:
شكرا
على رأيك وجرأتك بالاعتراف اننا فعلا محتاجين نسال لأن غيرك كان ممكن يطنش ويقوللى دماغك بقي ادينا عايشين وشكرا على الزياؤة

Anonymous said...

كنت متاكد انى هاللاقى بوست جامد وعلى فكرة انا مرة اتجننت وسالت نفسى الاسئلة دى بس الحمد لله النوبة عدت على خير
وبما انك بتتكلمى عن معنى الوجود الانسانى ودور كل واحد ورسالته فى الحياة ايه واهمية التفكير فى اجابات تلك الاسئلة فاحب اقولك بفخر ان معظم شعبنا اول ما يصحى من النوم برضوا بيطرح اسئلة بس ايه تانية خالص مثل يا ترى هاكل ايه النهاردة؟ياترى ممكن افطر واتغدى النهاردة ولا هاقضيها فول بس؟ كدة يعنى
بس انا شايف ان اجابات اسئلتك موجودة فى ديننا لو فهمناه صح يعنى ربنا بيقول (و ما خلقت الجن والانس الا ليعبدون) ادى اجابة وعرفناها وبعدين بقى نفسر ايه هى عبادة ربنا بقى لانها بتوضح ليه اتخلقنا وهى كلمة شاملة زى العمل والاصلاح فى الارض والامر بالمعروف والنهى عن المنكر والدعوة الى لله ومساعدة الناس ووووو حاجات كتير ومش عايز اطول اكتر من كدة بس فعلا البوست بيناقش موضوع مهم جدااااا من وجهة نظرى وربنا يكمل كل واحد بعقله ,.

salam.



’Muhammad Abouhashm.

أحمدى قاسم محمد said...

"بيني وبينك" هذه هي المرة الأولى التي أدخل مدونتك، وسررت بقراءة الموضوع، إحساس راق يدغدغ الأعصاب أن نطرح أنفسنا على الورق ونجلس لنتأملها. هذا ما منحه لنا التدوين، والحمد لله.
أنت تتحدثين عما سمي بالطلاسم، رغم أنها ليست كذلك، فهي بديهيات، ولكن مع الأسف مطلوب منا أن نتوصل إليها بمفردنا، فنحن كمن ولد في الصحراء، وعليه أن يصنع وعيه بنفسه، أو أن يزرع حديقته بيديه.
وأسئلتك، أو أسئلة الضيف أحمد، أو أسئلة التائهين في صحراء الجاهلية، نقطة الانطلاق لفهم الذات والكون، فإذا وجدناها فقد وجدنا الله.

هبة المنصورة said...

دى أول زيارة لمدونتك يا ياسمين
عجبتنى أوى التدوينه وخصوصاً إنها بتتزامن مع حيرتى اليومين دول ومحاولاتى إنى أغير فعلاً من حياتى وطريقة تفكيرى.. مش مشكلة بقى الواحد كبر شويه بس هو من امتى بتبقى عارفه تاخدى قرارات صح من أيام ثانويه عامة وقرار اختيار الكلية والسكة اللى بعد كده! أنا مش شايفاه عيب إنك تمشى ف سكة مش بتاعتك .. الغلط بقى إنك لما تكتشفى إنك تهتى تكملى ف نفس السكة من غير ماتسألى حد أو تسألى نفسك أنا فين؟ أنا باشوف سؤال أنا فين ده أهم سؤال ف الأسئلة دى كلها.. ومن مكانك الحالى هتعرفى الإجابات على بقية الأسئلة
ربنا يهدينا لطريق يرضاه.. دى الدعوة اللى بادعيها اليومين دول

آه كنت هانسى.. أنا عرفت مدونتك بعد ماقريتلك فى الجزء الأول من مدونات مصرية للجيب.. وطبعاً عجبنى كلامك
:)

jessy88 said...

محمد ابو هاشم:
ميزتك انك فاهمنى وبتجيب الكلمة من على طررررررف لسانى ملحوظة انت ممكن تقرأ موضوع مفتاح الحياة هتلاقي اللى انت بتقوله والله ينور عليكك يا باش مهندس رأى صائب مائتين فى المائة

jessy88 said...

احمد قاسم محمد:
انا معاك جدا ويمكن الاصح اننا لو عرفنا الله لوجدنا الاجابة والعكس الذي قلته انت ايضا صحيحه يعنى هى علاقة دائرية (علاقة البيض ولا الفرخة) وفى النهاية متفقين وشكرا على زيارتك نورت مدونتى

jessy88 said...

هبه المنصورى:
يا شيخة العدد بقاله سنة ولا حاجة وانتى لسه فاكرة تزورينى دلوقتى ماشي يا ستي منورة برضه حمد الله على السلامة ويا رب تكونى عرفتى تجاوبي الاسئلة وربنا يوفقك يا رب
مرة تانية نورتيني