بيني وبينك

صباح الفيس بوك

2009-01-04T10:24:00.000-08:00

سلام عليكم .. اولا بعتذر انى بقالى فترة مش بكتب مشاغل والله مشروع التخرج

وامتحانات ميد تيرم يعقبها تيرم يسبقه مذاكرة

وها انا الان فى تلك المرحلة المشئومة المهم انى جيت ...

صباح الفيس بوك ..مساء الفيس بوك ..ديسكاشن سعيد يا حضرت ...

فيس بوك فيس بوك

انا عارفة ان كل الناس اتكلمت فى الفيس بوك

بس اصله مش مستاهل هو مش ظاهرة

الحكاية كلها انى حابة اسأل سؤال هل نقدر نعتبر الفيس بوك درة بلوجر

..بمعنى

خلاص ..راحت على المدونات ؟؟

انا عن نفسي لا اتشبث بأى وسيلة سواء قديمة او حديثة

المهم الغاية والسؤال هنا للجميع

وبالأخص المدونين هل حقا سد الفيس بوك وجروبات

الفيس بوك الغاية من المدونات ؟؟

انا لا استنكر ولا أقر انا بسأل لأنى لاحظت ان الفيس

بوك اكتر فاعلية بس حسيت ان بلوجر

بيتيح امكانيات اخراجية وتصميمات أفضل مش

عارفة قلت ادردش مع اصحابي المدونين

اللى شكلهم نسيونى بما انى بقالى كتير مش

بكتب ... وبما انى عودتكم فى تدويناتى

ان خير الكلام ما قل ودل

اذا ..خلص الكلام

ومستنية ايجاباتكم يا تري خلاص ارفع تدوينة الاعتزال واعزل من هنا ؟؟

النص المليان

2008-11-07T13:00:00.000-08:00

طلما لسه الاغانى ممكنة ليه منغنيش؟؟ ترقص ؟؟أرقص غصب عنى ارقص غصب عنى غصب عنى ارقص وكمان اعلى صوتى فى الغناء كما فعل منير ...كل يوم أخبار ومقالات وتحقيقات وكلام وحكايات عن النصابين والمجرمين والفساد وكل ما يدعو للحزن والتشاؤم وكل ما يجعلنا لا نرى غير النصف الفاضي من الكوب لدرجة ان غضبنا من هذا الامر يدفعنا الى الالقاء بالكوب على الارض فيفرغ النصف المليان وتنكسر الكوب ...طالما هناك نصف مليان لماذا لا نتحدث عنه ونعلى صوتنا وطالما هذا النصف بدأ فى الازدياد لماذا لا نراه ؟؟ أتى طفل ذات يوم لأمه فقال لها وهو كسول امى لماذا لا تريد ان تتحرك يدي فقالت له يا ولدي ان يدك صغيرة وقصيرة و مشلولة ولن تتحرك مجددا وكلما كبر الولد وقال لها أرى أن يدي كبرت قالت له لا بل صغرت وبدأت تختفي انها مشلولة يا بنى ..الابن لا يسمع غير كلام أمه التى أحبت العيش فى دور الأم المناضلة المسكينة وكأنها صدقت كذبتها

..كبرالابن وهو يظن أنه مشلول وذات يوم هجم اللصوص على البيت وكادت أن تقتل أمه وهى تصرخ الحقنى الحقنى

حلّنى عنهم فبكي وهو يقول ليتنى لم أكن مشلولا فكيف لمشلول ان ينقذك فأجابته المرأة والله انى لأجد يدك كبرت قد مدها الله وشفاها لتنقذ أمك مدها وانقذنى وفك اسري قبل ان يأتى اللصوص مرة اخرى فمد يده فإذا هى سليمة وانقذ امه ...امى لقد شفيت ...

ابنى لقد ظلمتك وددت أن أعيش مرتاحة ولا أعمل فابلغت الجيران اننى ام لطفل عاجز عسي أن يشفقوا علينا ولم أستطع أن أعلمك الكذب

وقد كنت صغيرا فألفت عليك تلك الحيلة واستحبها كسلي واستسهلها لسانى حتى أن جاء اليوم الذي رأيت فيه حاجتى لليد التى قطعتها انا بكذبي !!!!

نعم لدينا جمعيات خيرية فى زيادة كل يوم ..نعم لدينا جمعيات تنموية فى ازدياد كل يوم ..نعم لدينا شباب بدأ يسأم من الهرج والمرج ويبحث عن الطريق الصح ..نعم ترى عيني فى المؤتمرات والمعارض ومراكز التدريب كل يوم شباب لو كانت مصر جبلا لحملوها وهم فرحين..يبرزون وقت ازمة الرجالة يقولون ها نحن ...مازلت أرى شباب أمام المساجد يمسكون بيد المرأة العجوز ويعملون على تنظيم المرور حتى لا يتعارك السائقون امام بيت الله ..مازلت أرى بناتا على خلق ولا يسأمن من خدمة المجتمع وكلما قدموا خدمة ابتسمت قلوبهن فبدت السعادة على وجههن ولسان حالهن يقول هل من مزيد !!

نعم والله لم أخرج من مصر كل هذا فى مصر والله مصر الجديدة (مش المنطقة ..البلد) قادمة انا مش من الحزب الوطنى والله ولا ليه علاقة بالفكر الجديد دة بس شايفة بريق من الامل أدعو الله أن نراه كلنا حتى لا تشل ايدينا ونحن أصحاء وحتى يعلم ذا اليد العليا ان لديه يد فيسخى بها جهدا ومالا وعلما وحتى لا أخرج عن المنطق الذي ارتضيته منهجا لى ..علميا منتهى اى منحنى هو بداية مطلعه مرة اخرى ..هاتلى راجل يقولك ان المنحنى لسه فاضله سانتيمير ..اذاً نحن صاعدون بالتأكيد وكل ما ذكرته كان أول الشواهد ...ها شفت بقي النصف المليان ؟؟

ليت شعري ...يعجبكم

2008-10-12T05:39:00.000-07:00

نون
قلم وان كان معدن وحبر
ولكنه يعلم ما لم يدر به بشر
بيضاء لون القلب الطيب
وعليها كل شئ اكتب
هما صاحباي فى وحدتى وخلوتى
حفاظ سر هما ونعم الصحبةِ
لهما فحسب يجود قلبي باسراره
والعقل يصب ويشرح افكاره
نون والقلم وما به اسطر
حفاظ ٌ هم ما بالعقول يخطر
(2008)

الحبيب الغائب
احبيباه.... والله يعجز ان يصف حبى لك كلاما
ولكنه قلمى من جرى بدون اذنى عشقا لك وغراما

ويعلم ربي انى لارجو رؤياك ولو بمنام
يأبى قلبي الا تكون اليه احب الانام
اشتقت اليك وادعو ان تجري بل تهرول الايام
لألقاك واشرب من يدك عند بئرك يوم القيامة
ويالها من مكانة عطرة لا ينالها الا الكرام

يا خير خلق الله وارفعهم مقام
يامن جعل للمسلمين مكانة بين سائر الاقوام
وانك لمن رسم لهم طريق العزة والكرامة
ولا اجد لهم حالا بعد هجر سنتك غير الهوان

قد قال مسيلم*مالنا ولهذا السبيل
!!اوليس سبيل العزة هو الاسلام
انبياه ...صلاة عليك من الله وسلاما
(2005)

سوق الزخرف

يا ماسكين على الجمر هنيئا لكم
فلتبقوا صامدين او تكونوا كغيركم

ممن خافوا مساسا بها فتورعو
عزفوا عن الدنيا وعن الحياة اقلعو ا

واخرين القوا جمرهم لثلوجهم
سينعموا بها قليلا فى حياتهم

ثم اللهيب يأتى فيقولوا ليتهم
ما تركوا جمرا الا كان فى ايديهم

جناتكم هى داركم بعد اللهيب الدنوى
فثابروا وجاهدوا نفسا ابت ان تنطوى

انتم ام جرى ابنها دخل فى سوق الزخرف
فاذا زاغت ابصارها فقدت نقاط الاحرف

ضاع انبها ولن يعد يا حصرتا على ما ذهب
فاذا فقدت فلذ الكبد ماذا ستصنع بالذهب؟
(2007)

هاجر القرأن

ما لى؟أبعدت عنك فقد أبعدك الذنوب
أراجع الى مسامع قلبى حين أتوب
**********
يا أحرف من نور انزلت على سيد المرسلين
أنزلت رحمة بنا من رب العالمين
**********
يا مؤنسى حين يتوارى علىّ التراب
يا نورى فى قبرى و مانع عنى عذاب
**********
يكاد قلبى ينفطر فهو اليك مشتاق
ترى أذنب ما هو لألام قلبى خلاق؟
**********
أنزلت الينا بكلم عذب
تخرج من الافواه ليصبح بك اللسن رطب
ولكننا نهجرك حتى يهل رمضان
نبيت ونقوم و القلب اليك ظمأن
*********
فلما القسوة و الهجر من قلوبنا
يا ربيع قلب المؤمن عد الينا
و أرونا.....
(2004)

قلب دامع
كفاك ِ يا هموم على قلبى تدفقا
عينى على قلبي منك صارت مشفقة
*********
وها هى عينى تجود شفقة على القلب المكلوم
وها هو قلبي قلب جريح ضعيف مظلوم

ويحك يا عبراتي أستظلين هكذا تنهمرين؟
قد قرحت الجفن و باتت تشكو منك العين
والنوم قد جفاني و عظم بيني وبينه الحنين
يا قلبي هون عليك لم ترى سوى بعض السنين
والملأ قالوا عن الزمان أمتلأ وفاض منه الأنين
فصبرا جميلا ولا تعجل كونك حزين
*********
ويا عينى مهلا... مهلا عبراتك... مُهَلا ... مُهلا
رحماك بنظري و رفقا قد ضعف و يخشي العدما
قولى لقدرك بك أهلا ولربك ... حمدا.. حمدا
فبأذن الله تعالى ما صعب يصبح سهلا

(2006)

على خطى الحبيب

هلم يا مسلم على خطى الحبيب
تقول الا ان نصر الله قريب ؟!
بلى ولكنك قد بلغك المشيب
و لم تعد تخطو على خطى الحبيب

لا تقل ليت الأسلام يعود يوما
بل على نفسك و عزيمك الق ِ لوما
و قم وأنهض يعز الأسلام دوما
و يكن عدوه على مسه رقيب

وأ جعل منهجك هو الأسلام
لا تعش لنفسك وعش للانام
ليهل النصر و يعم السلام

قد جرح الأسلام و ينادى
مستغيثا: هل من طبيب؟

فهلم هلم على خطى الحبيب

(2005)

مكانتى ...

انا ساصنع نفسي بنفسي
انا سأبنى مكانتى
لن اخذ مكانة غيري
تلك ليست شيمتى
ان عملت واجتهدت
كان فى ذلك عزتى
وان وهنت واستسلمت
تلك كانت اخرتى
ليس لى فى اليأس امة
وانما الامل امتى
لا ابالى لمن ينوح وانما لارادتى
ورب ساعات تجمعنا بعد اعوام عدة
لأقول بكل فخر رافعة لهامتى
ها قد صنعت نفسي بنفسي
ها قد بنيت مكانتى ...
(2003 )

فى حب اسمها ايه

بحبِك لأن مفيش حد أدى هيحبِك
ولأن مفيش غيري شايل همِك
ولأنى بجد عارفة انِك
تستاهلى حبي واحترامى
تستاهلى كل كبريائي
ده كلام بجد انا مش بجامِلك
ومش بتغر فيكي لأنك
ليكي قدر وانا عارفاه
بحبك يا انا
ومش هستعيذ من قولة انا
لأنى لا ذنب ولا اجرام
ولأن وجودى مش حرام
ولأنى مش هقبل اعدام
كونى طول ما هنا
(2008)

أنسان وشوية اسئلة

2008-09-24T14:23:00.000-07:00

أنا مين ؟ أنا فين؟ أنا ليه؟ انا ازاى؟ انا أمتى ؟؟!!!! أسئلة طرحها الضيف احمد فى أحد الأفلام التي كان يجسد بها دور مجنون ...غريبة مع ان تلك الاسئلة لا يسألها الا أعقل العقلاء بل على العكس.. فمن يمكنه ان يعيش وهو لا يعلم لماذا وجد وأين وكيف ومتى ومن هو ؟؟ ما هى صفاته ..ايجابياته ..سلبياته ..دوره فى الحياة ؟؟ حقا كيف يمكن للانسان ان يشعر بمعنى الحياة اذا كان لا يعرف أجابة تلك الاسئلة ...ظاهرة غريبة .. داليدا واليا ابو ماضي وغيرهم من الذين غنوا و كتبوا الكثير عن الحياة والتفاؤل انتهت حياتهم بالاستقالة من الحياة ..بالهروب...بالانتحار !!
كيف؟؟ لم اجد اجابة لهذا السؤال سوي انهم لم يجدوا سببا يعيشون من أجله لا يعنى كونى فنان مشهور او مرموق اننى وجدت سببا أعيش من اجله لأن الفن لو لم يكن لرسالة لما كان سوي ا تعبيرا ورسم للواقع بعين المبدع وهذا ليس سببا أعيش من اجله هذا ليس تحقيرا من شأن الفن ولكنه توضيح واكرر ذلك لمن يمارس الفن بلا رسالة ...انا عايش ليه؟؟؟؟ انا ربنا خلقنى ليه؟؟؟ ويبقي حلو اوى لو السؤال الاخير سئل بتلك الصيغة اقصد لو السائل كان يعلم ان له خالق وان الله هو من خلقه لأنه بكدا بيوفر على نفسه نصف المشوار ...شباب كثير عايش من غير ما يعرف هو عايش ليه ...خروجة وبنت حلوة وشغلانة كويسة تجيب فلوس كتير عشان برضه يعرف يخرج خروجة حلوة وعشان برضة يبقي شيك وجذاب وتنجذبله البنت الحلاوة أو فى حالة انه شاب اكثر جدية .. شاب يعيش بنظرية الرجل العادى بيجيب مجموع عشان شكله قدام الناس ... يدخل كلية مرموقة حتى لو مكنتش طموحه اللى ممكن بكون متاح امامه لكن شكله وبرستيجه يحكم ...ابقي جايب مجموع سياسة واقتصاد وادخل علوم ؟؟؟ ابقي جايب مجموع صيدلة وادخل السن؟؟؟ والنتيجة نخسر مترجم محترم وعالم فاذ عشان البريستيج ...من يفعل ذلك مؤكد انه لا يعرف لماذا يعيش وعلى ذلك تكون حياته ... زوجة لأنى لازم اتجوز ...وأبناء فى مدارس لغات حتى ان كنت لا اشجعها بس اصل العيلة كلها فى مدرسة لغات اشمعنا ابني وما الى ذلك من ظواهر الحياة العشوائية التى تفتقد المبدأ والهدف نعم لابد ان يكون هناك مبدع وغير مبدع وغنى وفقير وذكى وقليل الذكاء ولكن ماذا لو عرف كل من هؤلاء لماذا خلق؟؟ لماذا وجد ؟؟ المشكلة ان تلك الاسئلة التى توفر على بنى ادم الكثير من الوقت والجهد والتفكير لا يسألها العقلاء وان قلنا اننا بمقتضي هذا الفيلم نقر أن من يسألها لا بد ان يكون مجنونا ..اذًا أين السألين؟؟ اظن أن مصرنا فى عصرنا الحالى بها عدد لا بأس به من المجانين !!!
وعامة سواء القارئ عاقل او مجنون او نص نص ... ارجوه ان يغلق المدونة بعد قرأة هذه التدوينة ويردد فى كل فخر بدون خوف ولا خجل من الضاحكين والضاحكات والساخرين والساخرات ...انا مين ؟؟ انا فين ؟؟ انا ليه ؟؟انا ازاى ؟؟انا امتى؟؟!!!

مفتاح الحياة

2008-09-13T08:45:00.000-07:00

كلمة من ثلاثة احرف ...سهلة النطق ..ينطقها الكثيرون ولكن كم ممن ينطقها ويقسم بها يعلم معناها حقا؟؟ ليس صعبا ولكنه السهل الممتنع ..ليس ممتنعا عن قصد بل امتنع عن البحث عنه الانسان انها كلمة "دين" ومعاناها
يعنى ايه دين؟؟؟ ترى البعض يقول لك دين يعنى صلاة وصوم وزكاة وقرأن وصلى على النبي (عليه الصلاة والسلام) ..اخر ينطقها فى تعصب : انت متخلف ...حماااار الدين خلق ومعاملات (واضح اوى الخلق من كلمة حمار ومتخلف ) اخر يقول: بس يا جهلاااء... الدين يعنى علم وعمل وتعمير فى الارض ...السؤال الذى يطرح نفسه الا يقدر من جعل الكلمة من ثلاثة احرف ان يجعل معناها يشتمل تلك الثلاثة مكونات ؟؟؟؟ الدين ببساطة يا جماعة هو الحياة والحياة لا تكون الا بتلك المكونات الثلاثة ...عبادات ..خلق ...عمارة اكتشاف هذا الامر لا يحتاج سوي شيئا واحد اسمه العقل لأن الدين والحساب والعقاب لا يكون الا لذوى العقل (اولوا الالباب) فلنجعله حوار عقول ..قاعدة اساسية للوصول للحق هى الرجوع لاصل الشئ حاول ان ترجع معى لأصلك وأصل وجودك على الارض ...قصة سيدنا ادم التى طالما قرأناها ولكننا للاسف لم نفهمها انها قصة انسان خلقه الله ليعمر فى الارض ويستخلفه بها ...لماذا ليس الملاك ؟ ولماذا ليس الجن؟؟ ليس الجن لأنهم افسدوا واسأوا خُلُقا ..وليس الملاك لأن الملاك لا يملك من العلم ما يمكله الانسان
هذا ليس كلامى انه كلام الله فى سورة البقرة ( وعلم ادم الاسماء )الى اخر الايات الم يجرى الله مناظرة بين الملاك والانسان فكان الانسان اكثر علماا وبالتالى كان الاجدر بالخلافة فى الارض ؟ ذلك لأن الاعمار يحتاج الى علم ..اذاً كيف لعاقل ان يقول ان المسجد والعبادات هما الدين فقط ؟؟ وكيف لعاقل ان يقول ان حضور دروس الدين واطلاق اللحية وارتداء النقاب هما الدين ومشكلتى بس الاخلاق ؟؟؟ يعنى ايه مشكلتى بس الاخلاق ويعنى ايه" بس" دى وكيف لعالم لا يؤدى حتى فرض الصلاة ان يقول انه يطبق روح الدين عفوا يا سيدي لو كانت الروح فقط هى الاساس لماذا خلقك الله بجسد ؟؟؟ إن مثل العبادات كمثل الاداريات فى اى شركة او مؤسسة ..كيف لموظف لا يحضر الاجتماع بالمدير ولا يتبع نظام الشركة ولا يملك (كارنيه) ان يكون منتميا لهذه الشركة ؟؟؟ لو كان من يحقر من شأن العبادات يعرف انه هنا مستخلف لما انكر الصلة بالملك اما العلم والعمل فهما حقا الغرض من الخلق ولكن كيف اؤدى مهمة وانا لا اعرف لماذا أؤديها ؟؟ فى نفس الوقت من يتعبد ولا يعلم او يعمل فى الارض بما يعمرها فلم يؤدى المهمة التى خلق من اجلها(كلا لم يقض ما امره)اكذلك الرجل الذي يعمل فى تجارة الزى الاسلامى (كما يزعم) فى مكان به ما لا يقل عن 5 محلات غيره بدعوة ان ذلك يكسبه الثواب اى ثواب هذا بدون اضافة ؟؟؟
المكون الثالث وهو الخلق ولا اقصد بالثالث الاقل اهمية ولكننى مضطرة لذكر شئ قبل شئ واذا كان الحديث كمثل التفكير بدون ترتيب او زمن(فانت لا تفكر كلمة كلمة مثلما تنطق كلمة كلمة) لقلتهم جميعا فى صوت واحد فمازلت لم استطع ترتيبهم .... منذ حوالى سنة تعرفت على بعض الفتايات هنا حقا خير من عرفت من المسلمين والمسلمات لا يرتدون نقابا او خمارا ولكنهن محجبات ..لا يعكفن فى المساجد ولكنهن يصلين الفروض فقط ..اما خلقهن فهو حقا ما علمنى كلمة خلق ... خلقهن هو ألا يأذين أحدا بقول أو بفعل أو حتى بنظرة ..لا يرددن سائل ولا يخذلن محتاج ولا ينطقن كلمة قبيحة انهن من علمنى الدين ....الدين اذا هو ان اعيش لأعمر الارض ولأن حولى اناس فلابد من خلق للتعامل معهم ولأن ذلك كله خلافة لله فلابد من الصلة به عن طريق العبادات ولأن الحياة وجود ثم عيش ثم وفاة ولأن الوجود كان بالله و منهج العيش علمنا اياه الله ورسوله اذ انه حثنا على التعلم والبحث عن اسرار الارض كلها (ليس كما يزعم بعض الجهلاء بأن العلم هو فقط العلم الشرعى وأن الوان الثقافة مجون) ولأن الوفاة رجوع لله اذا فالدين(كما اراه بمكوناته الثلاث) هو مفتاح الحياة

سعيدة اننى انا

2008-08-30T13:49:00.000-07:00

لولم تكن مصريا لوددت ان تكون ؟؟؟!!! سؤالا سألته لى احدى صديقاتى
بغته دون استعداد مسبق منى لاجابته الا انى وجدتنى اقول وبسرعة مصرية فباغتتنى مجددا بسؤال اخر كان اصعب ... لماذا ؟؟ هنا بدأت افكر لماذا احب كونى مصرية ألا اننى لو كنت خلقت خليجية او اماراتية او اى جنسية اخرى لكنت سأنتمى ايضا لبلدي؟!! ... بالامس البعيييد قالها مصطفي كامل لما لمصر من تراث وحضارة ولسمة عصره من بطولة انذاك اما الان فلماذا نقولها ؟؟ اجابة هذا السؤال حضرتنى فجأة عندما تذكرت الرسول صلى الله عليه وسلم ودموعه على ابواب مكة وطنه ... بكي لأنه سيغادرها ووعد ارضها بالرجوع لماذا لم يرد رسول الله صلى الله عليه وسلم ان يكون من ابناء المدينة وهى التى اكرمه اهلها ورأى فيها الأسلام وهو ينتشر فى الارض ومنها حقق اعظم البطولات والانتصارات .. لماذا عاد الى مكة مجددا وهى التى كذبه اهلها وطردوه واتباعه من المسلمين ... تذكرت ان الله سبحانه وتعالى لا يخلق شيئا اعتباطا فجاوبتها بكل ثقة ...لو كان يجدر بي ان اكون شيئا اخر غير مصرية لما خلقنى الله فى مصر ..لو كان لى دور فى مكان اخر .. لما خلقت فى مصر باختصار لم يخلق الله لى مصرا بل خلقنى انا لمصر... فلنكن واقعيون ولا يأخذنا الاعتزاز بالوطن الى التحقير من شأن الاوطان الاخرى قلب المصري وهو يغنّى بلادى ..بلادى ويحي العلم المصري هو ذاته لذلك الامريكي الذي يحارب من اجل بلده ويرتكب جرائمه باسم الوطن ...هو ذاته للصينى وهو يغترب ويطرق الابواب ويجول على قدميه من منزل لاخر ومن معرض لاخر من اجل نشر منتجات بلده ومن اجل ان يتحقق الحلم بان تكون الصين على كل شبر فى الارض لا بالظلم ولا بالجور على احد ولا باحتلال ولا بحرب وانما بالعمل والكد فاذا فكرنا بتلك الطريقة العقلانية سنجد لمصر مكانا واسعا فى قلوبنا فما العقل والقلب الا فصان لثمرة الانسان ولا بد ان يتفقا كى يتحقق الاتزان النفسي له و لو ايقن كل منا انه خلق فى مصر لأنه لابد ان يكون مصريا لما تمني ان يخرج من ارضها ولما رضي لثمرة تحتاجها مصر ان تبذر فى ارض اخرى
الاجابة نفسها وبنفس المنطق لسؤال هل انت او انتى سعيد او سعيدة بنوعك والسؤال يكثر لدى الفتايات ماذا لو كنت رجلا؟؟؟ ببساطة لما كنت انا وبالتالى لا داعى للسؤال اذا كنتى تسألى عن حالك وانتى ذكر فلا تسألى لأن حالتك تطلبت ان تكونى انثي فخلقتى انثي ولأن لا النوع ولا الجنسية ولا الشكل ولا حتى الاسم يحدد مسار حياتك وانما حياتك و مهمتك فى الحياة والهدف من خلقك هو ما يحدد لكى كل ذلك ...ومن هنا اقولها وبكل فخر اعتز بكونى فتاة مصرية شكلى هكذا وطولى هكذا واسمي هو ذاك وابويا هما فلان وفلانة واهلى هم هؤلاء لأنى ببساطة اعتز اننى انا وسعيدة اننى انا ولكن لحظة.. نعم اعتز بنفسي ولكنى لا ارضي بمستواى العلمى او الخلقى او الدينى فاسعي دائما للارتقاء بهم فسعادتى اننى انا غير سعادتى اننى هكذا ولكننى اكررها سعيدة اننى انا
بحبك يا انا ومش هستعيذ من قولة انا
لأنى لا ذنب ولا اجرام

ولأن وجودى مش حرام

لأنى مش هقبل اعدام

كونى طول مانا هنا

أفق والمأذنة وما ادراك ما المأذنة

2008-08-28T18:32:00.000-07:00

محدث

كان يوم جميل وبه عبق ولحظات رعب تقدروا تشوفوها على الفيس بوك لأن فاعل خير اسمه معتز صورنى وانا مرعوبة فوقها... الحكاية بدأت لما فاعل الخير التانى المهندس مصطفي جبر واللى قام بدور المرشد فى الرحلة دى قرر ينهال علينا بثقافته التاريخية وينعم علينا برحلة فى شارع المعز لدين الله بدئا من بوابة الفتوح ومسجد المعز مرورا ببيت السحيمي شهبندر التجار وحتى بوابة زويلة والمأذنة (وما ادراك ما المأذنة) ....الرحلة كانت تابعة لجمعية أفق وهى جمعية تنموية جامدة جدا بالتعاون مع اكبر المنظمات العالمية بتدى دورات كومبيوتر وتنمية بشرية بأسعار لا تقارن بالاسعارالحقيقية للكورسات دى بالاضافة الى أنهم بيساعدوا الشباب على اقامة مشروعاتهم وتسهيل القروض لهم .. المهم عشان منطلعش من الموضوع يومها قلت بما انى هقابل شاهبندر التجار اللى هو السحيمى اتنأنتك والبس كويس لأنى اصلا صاحبة مزاج فى اللبس قمت لبست ابيض وكعب عالى مكنتش اعرف اللى هيحصللى

الساعة عشرة ونص وشوية كدا امام بوابة الفتوح اجتمعنا الحمد لله ...كنا حوالى خمسة ولاد وبنتين كريستين وانا ومصطفي جبر المرشد السياحى بتاعنا ومعتز الشعراوى أمين عام الجمعية ونشّار (واحد كدا بيضحك كتير بس جدع والله ) وتنين أصحابه, مرت الرحلة بأمان وسلام أتفرجنا على حاجات حلوة اوى كوزالسحيمي وأشجار البيت والسبيل وحاجات تانية كتير إلى أن وصلنا الى بوابة زويلة هى كدا طول عمرها مصدر رعب وهناك بقي عينكم ماتشوف إلا النور وصلنا للمأذنة اللى موجودة هناك ... طولها مش عارفة كام بالظبط بس طويييييييييييييلة اوى الطريق اليها عامل زى الطريق الى ايلات ...سلالم صغيرة اوى يادوب تشيل رِجل واحد مقاسه 40 ومترتبة بشكل دائري زى الزحليقة كدا وبعد حوالى عشر دقايق طلوع تلاقي سلم تانى حديد الجدع يطلعه وكل ده عشان في الاخر تتحشر فى مكان متر فى ربع متر كدة اللى هو لو حبيت تبص وراك ممكن تقع ... من فوق المأذنة دى شفنا العباسية ورمسيس وفندق الفور سيزونز مش عارفة بقي قدروا انتوا طولها المهم فاكرين طبعا انى رايحة لابسة جيبة بيضاء و كعب عالى المفروض بقي أنى اطلع... كريستين طلعت فافي وقالت (نو واى )مش طالعة وانا عملت فيها عنتر وياريتنى ماعملت عنتر يخربيت عنتر على عبلة على كل اللى يتفلحص وسعولى بدأت مشوار الطلوع السلم لا ينتهى لدرجة انى حسيت انه انفينتى إلى ما لا نهاية يعنى واخيرا وصلت هيييه فين بقي الكافيه اللى هنقعد فيه ؟؟؟ اوبا هو انا هقف هنا؟؟؟ زى ما قلتلكم شاطر ومشطور وبينهم انسان هو دة المكان اللى هقف فيه ؟؟؟؟ ببعض الحركات البطولية استطعت ان اصل الى المراد وقمت بالبطولة وطبعا النزول كان بطولة تانية بقي كنت خلاااص قربت اعيط ودة كله باين فى الصور اللى ولاد الحلال صوروهالى وانا مرعوبة ونزلوها على الفيس بوك انتهت الرحلة بعدعناء النزول مهى فعلا كان لازم تنتهى انا نفسي انتهيت ...خلال تلك الرحلة شعرت بأكثر من شعور

أولا احساس أننا بلد له تاريخ مشرف يعنى مش كلام فى الكتب إن كان يحزننى هذا الشعور اكثرمما يفرحنى لأنى بتصدم من الانتكاسة التى اصابتنا و فى نفس الوقت بتشجع اكثر للعمل على تنمية البلد دى عشان ترجع ترفع رأسها تاني.. عشان كدا بشجع أفق وكل اللى زيها نهضة المحروسة وزدنى وكل مراكز وجمعيات التنمية اللى حاولت اعمل عنهم موضوعات فى الجريدة بس للاسف هم يروا ان التنمية واجب على كل مواطن لا يشكر عليه وانا اختلف معهم تماما عشان كدا كتبت البوست دة ... الاحساس التانى كان مع كريستين هى فتاة مسيحية مصرية وبجد مصرية بالرغم من ان نص كلامها انجليزي الا انها مصرية عرفت دة لما دخلت معانا كل المساجد الاثرية وكمان المسجد اللى دخلت اصلي فيه الظهر دخلت معايا عشان تساعدنى ...الاحساس الثالث (الكلام موجه لكل الولاد اللى كانوا معانا فى الرحلة) حسيت ان مصر لسه فيها رجالة مش قادرة اقولكم ازاى ساعدونى طول الرحلة لكن دا مش غريب على ناس عملهم فى المجتمع انهم يعملوا حاجة مفيدة للبلد دى وحتى اللى مكنوش ينتموا لافق برضه كانوا رجالة بجد شكرا لأفق وللمرشد بتاعنا اللى ادانا معلومات كتييييييير مهمة (من علمنى حرفا ...قلت له شكرا يا عم )دة تعديل المثل لأنى لا اعبد الا الله

بالمناسبة التدوينة دى متأخرة اوى بس والله المشاغل

تحرير ..رمسيس..مترو..اتوبيس

2008-08-17T12:30:00.000-07:00

معكم من داخل القلب المصري بتقلباته واملامه وارائه كله هنا من داخل مواصلتهم ...المترو , حجرة عمليات نبض الشارع المصري ..مكان يحفه على الجانبين مقاعد وفى المنتصف حلقات مخصصة لمن لم يسعفهم الحظ ويجدون مقاعد فارغة وهم الاغلبية ..لا استطيع ان انقل لكم الان معالم المترو فقد امتلأ..امتلأ ..امتلأ انه يكاد ينفجر فلا اكاد ارى قدمى ولكن المؤكد انها تحت احدى الاقدام المجاورة وكذلك كل اعضائي واعضاء الركاب ولكن تبقي اذاننا صاغية ..امرأتان تجلسا بجوار بعضهن البعض يبدو انهن على معرفة سابقة ببعض هاتف الاولى يرن باغنية لأصالة فتجيب بكل فخر الثانية تنظر بل تحملق بالموبايل وبعد ما تنتهى الاولى من مكالمتها تلاحقها الثانية بالسؤال: الميبايل دا جديد(بتعطيش الدال) ؟ الاولى فى فخر: اه جوزى لسه جايبهولى الاسبوع اللى فات ,, الثانية: بس رناته حلوة اوى اوى ورينى كدا فى اغانى ايه كمان.. الاولى لا تعطيها الموبايل وتقول لها : لأ دا اصله فى كل الاغانى اصله حديث فى حاجة كدا اسمها البلتوس بيجيب الاغنية اللى انتى عايزاها ..الثانية فى ذهول: والله!! الله يعنى البلتوس دة فى اغنية ........ ؟؟؟ الاولى: اه طبعا كل الاغانى,,, الثانية : الله وده ينفع يتجاب على اى ميبايل ولا الحديث بس وريهولى كدا ,, الاولى: "لأ الحديث بس معشان كدا غالى " ومازالت ترفض ان تعطيه لها ومازالت الثانية تحملق بالهاتف ( ربنا يستر عليه )
ومن الحديث عن ذلك الاختراع الخارق اللى جنن الشعب المصري الغلبان البلتوس (البلو توث سابقا) الى الحديث عن ازمة عنوسة البنات والشباب ...امرأة مصرية تبدو ام لاحد الشباب تتحدث الى راكبة مثلها فى المرحلة العمرية نفسها تسبب فى معرفتهم المترو ... الاولى: والله البنات دول صعبانين عليا شقيانين فى الحر دة ورايحين جايين على الجامعة والدرس ومعرفش ايه وفى الاخر مصيرهم البيت ,,الثانية: اه والنبى ياختى لا بقي فيه شغل ولا جواز ,,الاولى: وحياتك ياختى ولا الولاد لاقيين اهو عندك مثلا الواد ابنى لما بفكر فى مستقبله اقول دة هيتجوز ازاى دا ؟!!دا لسه لا جهز نفسه ولا حوش قرش ومرتبه مش بيكافيه دانا بقول ابيعله حتتين صيغة اهم يساعدوا باى حاجة والله الواحد حاسس بالعجز مع الشباب دول لا عارفين نساعدهم ولا عاجبانا قعدتهم دى ..
الاولى: اه والله مهم البنات قاعدين عشان كدا هو فى عرسان جاهزين عشان تتجوزوا (ثم تنظر الى المجاورات لها من البنات وهن واقفات يمزحن ويتبادلن الضحكات الخفية على ما يسمعون ) يا رب تتجوزوا يا بنات بقي واحنا قدهم كنا عندنا عيال !!!
ومن المترو وحكاياته الى الاتوبيس ومغامراته والاتوبيس اليوم انواع هناك الاتوبيس المتميز (ابو خمسة وسبعون قرش) والعادى بتاع عامة الشعب (ابو ربع جنية او خمسين حسب المسافة) ..نبدأ بالمتميز ..كنت اظنه اوبيسا مكيفا اول الامر اولا لأنه نفس اللون ثانيا لأن التوبيس المكيف احيانا كثيرة لا يكون مكيفا(التكييف بايظ) الا ان صوت ركاب المقعدين التاليين لمقعدى وهم يتعارفون من خلال الاتوبيس كعادة الشعب المصري الألوف قد نبهنى بأن ثمة رائحة للشعب الغلبان الطيب بالمكان مؤكد انه اتوبيسا شعبيا
كان رجلا عاجوزا قد يتجاوز عمره الخمسين وامرأة تبدو فى اوائل الثلاثينات من عمرها ...الرجل: ابنك دة
المرأة: اه ابنى
الرجل: ما شاء الله ربنا يخليهملك وانتى بقي منين ؟
المرأة: من المنصورة
الرجل: احسن ناس والله انا برضك واخد من هناك بنت خالتى بس ايه مراتى دى بقى بحبها اوى
المرأة : ربنا يخليهالك واخدين بعض عن حب بقي
الرجل: اه طبعا دى قصتنا كانت قصة حب عنيفة اوى دى اتحدت اهلها عشانى مهى كمان كانت بتحبنى اوى مانا مكنتش كدا زمان وانا صغير
المرأة : وهم اهلها كانوا ممانعين ليه مش بتقول قرايب؟
الرجل: اه بس اصلى كنت على اد حالى ساعتها
المرأة : طب وبعدين
الرجل: ولا قبلين هى اصرت وقالت لاهلها مش واخدة غيره وانا برضك زنيت عليهم شوية واهو ادينا متجوزين وعندى منها تلت عيال معلمهم احسن تعليم وهما حلوين بقي زي امهم مهى من المنصورة وبتوع المنصورة حلوين (يقولها على استحياء وضحك) البت الصغيرة بقي اللى فى الثانوي دى زى فلقة القمر اه والله تشوفيها تقولى سبحان من صور
المرأة: ما شاء الله ربنا يخليهومك ..النصيب بقي مهى الحاجات دى بالذات نصيب ومكتوب ..ويصل الحاج الى مقصده فيتأهب للنزول : يللا سلام ,,المرأة: مع الف سلامة سلام
وعلى صوت عطسة احدى الراكبات انتبه الجالس بجوارها لاحتمال ان تكون مريضة فلم يستحى ان يبدأ معها حوار طبي لطيف : انتى واخدة برد ؟!!
الراكبة: اه (هتسي)
الرجل: الللا طب افتحى الشباك احسن بعدين اتعدي منك وساكتة كدا مش تقولى ناخد احتياطنا (ويضحك فى تلقائية ) عارفة بقي انتى تروّحى تاخديلك قرص فلوريست وتقرشي لمونة كدا بمرارتها وتنامى تصبحى زى الحصان اه والله
وردا على نصائحه الطبية المجانية ترد عليه: شكرا ..
المشهد التالى من الاتونبيس العادى(ابو ربع جنية)..الزحام لا يقل كثيرا عنه فى المترو صوت الاطفال مع صوت الكمسري ومعاركات الركاب تنسخ سينفونية شعبية اصيلة وفى وسط تلك السينفونية اقف بجوار امرأة تفاصل مع الكمسري : ليه خمسين قرش ليه انا جاية امبارح بربع جنية
الكمسري: المسافة يا ماما من اول المحطة لحد النص بربع جنية بعد كدا بخمسين
المرأة: خد يا اخويا (وفى حديث موجه للركاب عموما والمجاورين لها بالاخص ومنهم انا) الواحد مبأش عارف يعمل ايه فى الغلا دة خلاص كله غلى يعنى نسرق بقي ولا نعمل ايه!!! استغفر الله العظيم ففف
جاء هذا الحوار بين الكمسري وتلك المرأة ليقطع حوار اخرمع احدى المجاورات لها حول زوجة ابنها و"عمايلها": البت ياختى وبجاحتها طالبة فلوس من الواد عشان ترجعله ال ايه عشر الاف جنية والنبى ولا تستاهل ..الثانية: اه والله ايدة داحنا واحنا قدها كنا نطلع لحمواتنا نشلهم الشقة شيل ودى ياختى ايه البجاحة دى والله مانا عارفة ايه الجيل المهبب دا على ايامنا مكناش كدا هى البنات جرالها ايه ؟؟

كان ذلك بالطبع قبل ان يصدمها الكمسري الا ان صدمة الكمسري تلتها صدمة اخرى لكل الركاب وهى كانت مشادة بين راكبة وراكب اثارت استغراب العديد من الركاب..
الراكب: يا ولية قومى خلى عندك دم بقولك عايز اقعد انتى بجحة اوى
الراكبة: انا برضه اللى بجحة مش قايمة يعنى مش قايمة
الراكب: انا تعبان ورجلى وجعانى يا ولية يا ......... قومى لامد ايدي عليكي
الراكبة: ولا تقدر تعمل حاجة !! اللا مانا كمان تعبانة هو ايه يا ختى دا متروح تتشطر على راجل زيك والا انت فالح بس تتخانق مع الستات
الراكب: غورى ان شالله ما توعى ادى كرسي فضي اهو جتك داهية مش عايز منك حاجة !!!!
الركاب: رجالة اخر زمن
مع العلم ان طرفي المشكلة لم يكونا على معرفة سابقة ببعض فهو ليس بزوجها كما سيخيل للبعض ..

الصراع بين ابناء المحروسة والذى تعد المواصلات احد مسارحه لم يقتصر على مثل تلك الامور السلوكية وانما ايضا الفكرية ...خلاف سياسي حاد ظاهره الاختلاف وباطنه الاتفتق على الاستنكار يدور بين اتوبيس باكمله اثر فتح احد الركاب سيرة الفساد بسبب خلاف مع ضابط مرور ..الراكب: الله يخربيت دى بلد ..بلد بنت ........ حاجة تقرف
اخر: اه والله عندك حق دى بقت حاجة بنت .....
يعترض اخر: متبس بقي انت وهو هتودونا فى داهية (يقولها بجدية واستياء شديد)
الراكب: يا عم انت مالك متبطلوا جبن بقي اما بلد جبانة صحيح
الاخر: مش جبانة ولا حاجة هو اما نقول اللى فى الصالح يبقي عيب انت ايه مش خايف على نفسك هو الكلام هيجيب نتيجة
الراكب الاول: ايه يعنى اللى هيحصل وهو مين واخد باله ولا سامع
الاخير: لأ يا عم دول بيعرفوا كل حاجة
وفورا تحول هذا الاختلاف الى خناقة من اجل ان يكف هذا المتمرد عن الحديث فى السياسة لأنه بذلك(هيوديهم فى داهية )ويعلو الصراخ والعويل وتتناثر الكلمات من اليمين ومن الشمال و الامام والخلف ولكن المؤكد ان الرؤية الان اصبحت معتمة ولا اكاد اسمع اى كلمة اختلط الكلمات لتنسج كلمة واحدة مفادها (مفيش فايدة)...

ومن النقل العام الى النقل الخاص وحوار بين امرأتين يبرز الفؤق بين الطفل الغنى بتاع النادى ونظيره الفقير بتاع مراجيح السبتية فيما يتعلق بالاعتماد على النفس والمسؤلية المبكرة ....الاولى: شوفتى ياختى الواد عمل ايه ؟؟
الثانية: ايه؟
الاولى: سهانى وانا قاعدة عند خاله وراح السلام لوحده
الثانية: يالوى المأروض دة اللى لسه فى ثانية ابتدائي ؟؟
الاولى: اه والله اصلى عمال يقوللى ياما عايز اروح ..عايز اروح وانا مسألتش فيه قام قاللى هاتى ربع جنية قلت يمكن هيشترى حاجة حلوة شوية وندور على الواد ابدا مهوش هنا وكنا خلاص هنبلغ لولا اتصلنا بيهم فى السلام وقالولنا الواد ركب الاتوبيس وجه
الثانية: شوفي ياختى العيال عيل لسه مطلعش من البيضة و يروح للسلام لوحده ...
حوارات اسرية وسياسية واقتصادية و مغامرات شعبية جدا يمكننا من خلالها ان نرسم ملامح الشعب المصري ونعرف ما يدور فى اذهانهم ..فقط القي بأذنك فى داخل اى مواصلة ..
كنا معكم من داخل مواصلات الشعب المصري للنقل لكم اخر اخبارهم واهم سماتهم من خلال السنتهم التى لا تكف عن الافصاح طوال بقائهم على ظهرها .

من هنا

2008-07-31T18:42:00.000-07:00

قال الجميع ..وجاء دورى لأقول وطالما تمنيت أن اقول ولا أعلم ما الذي حال دونى وامنيتى ةبالرغم من انى انشأت تلك المدونة خصيصا لأقول الا اننى لازلت لم اقول تفقدت مدونتى تدوينة تلو الاخرى فوجدتنى حقا لم اقل شيئا بعد .. لم اقل كيف اراها ..من هى؟؟ هى تلك التى يتحاكى بها الجميع كل يوم ...هى القضية.. قضية العصر فى مصر, مصر التى باتت كشجرة بلا اوراق كقلم بلا حبر علت الصيحات وكثرت الاحزاب منها ما يندد بالحاكم ومنها ما يندد بالنظام فاسمحوا لى ان اكون انا الاخرى حزبا واندد فيه بالمواطن ..نعم بالمواطن (تعالى نحسبها بالعلم كدا) الكل يساوى مجموع اجزائه والمجتمع كل وما به لا بد ان يساوى مجموع اجزائه واجزائه المواطنون انا لا ابرئ الحكومة ولكننى اقول ان رجل الشرطة والوزير والرئيس نفسه هو مصري ولد مثلما ولد ايا منّا وربته ام مصرية واب مصري ولكنه حالفه الحظ واصبح ذو سلطة فظهرت جهرا عيوبه وسلبياته اما وان والله لو كان ذلك الموظف الذى يقضي يومه يشرب الشاى ويلعب الكلمات المتقاطعة , اصبح وزيرا لظل على مكتبه ولكن استبدل الفول بالكافيار والشاي بالكابتشنو الكلمات المتقاطعة باوراق يمضيها سريعا ليختبر مدى سرعة قلمه الجديد الغالى ..حل اى مشكلة يبدأ من تحديد المشكلة واسبابها واذا عرف السبب عرف العلاج فلماذا نخدع انفسنا ونعيش دور الضحية ؟فلنعترف نعم نحن شعب بلا اخلاق حقا ندين بالاسلام ولكنه لا يتعدى خانة فى البطاقة فلا نطبقه ولا حتى نشمه والاسم شعب متدين ... كم ام مصرية قارئة جيدة وتحث ابنائها على القرأة ولا تبدا يوم ابنها بجملة(اوعى حد ياخد سندوتشاتك واللى يضربك اضربه وتف عليه كمان )؟؟؟ كم ام لدينا تبدأ يوم ابنها بجملة(لو حد من اصحابك محتاج حاجة ساعده عشان ربنا يحبك ولو حد شتمك متردش عليه عشان انت مؤدب وهو لأ وربنا مش بيحب اللى بيشتموا)؟؟
كم موظف مصري يحضر فى معاده وينصرف فى معاده ( مش الحضور يبقي 9 نيجي 9 ونص والانصراف يبقي 2 ونص نمشي 2 يعنى كرهنا اوى النص دلوقتى؟؟) طب بلاش كام واحد بيزق اخوه المصري لما بيبقي هيركب مترو مثلا عشان انا اركب وانت انشالله تتحرق ..او كام شاب بيقوم لمسن من على كرسي كبار السن اللى هو اصلا بتاعه فى المترو ..كم وكم وكم ؟؟ والله لو درسنا المجتماعات المتقدمة لوجدنا التقدم طال العنصر البشري اللى هو الجزء المكون للكل قبل اى عنصر اخر ..ولكن شعبنا :الحكومة هى السبب ...اصل الدنيا غدارة ...ايام وبنعشها هنعمل ايه؟؟؟ وما الى ذلك من سلبية وجهل والمفروض يعملوا المفروض يسووا طب ماتعمل انت والله انا نفسي اعرف تلك الجماعة المجهولة اللى المفروض يعملوا واللى بيقولوا واللى بيعملوا كل حاجة دول ..خلاصة القول لأنى اطلت الحديث لو عاوزين البلد دى تتصلح حالها ابدأوا بانفسكم اولا يا شباب ياللى مش لاقي شغل لو عندك دماغ هتلاقي الصندوق الاجتماعى للتنمية وجمعيات التنمية البشرية الخيرية كتييير وياللى قاعدة تقورى بتنجان ابنك اولى بوقتك وياللى ماشي تلعن فى الحكومة باقذر الشتائم نظف عقلك وقلبك ولسانك الاول وبعدين اتكلم ..يا مصريييييين ( ان الله لا يغير ما بقوم حتى يغيروا ما بانفسهم ) ...

وحش يعنى وحش

2008-07-28T01:57:00.000-07:00

عذرا مضطرة اقلب عليكم المواجع ..هفكركم بذكريات سيئة جدا ...فاكر او فاكرة يوم ما رحت تطلع البطاقة ساعتها قلت لكل اصحابك واهلك انك رايح تطلعها فى اليوم دة وزى الفالح قلتلهم انت هتجيبها امتى ويوم استلامها ......الفااااجعة يحاول الموظف ان يقنعك انها بطاقتك وانت ..لا مش دى انا انا دى بطاقة حد تانى من فضلك البطاقة ..يا استاذ هى دى احم احم من الموظف على جيبك عدل وكل اللى يسألك جبت البطاقة طبعا الاجابة .... تتوه ها شفت ماتش امبارح واصحابك يكتفوك وينيموك على الارض عشان يشوفوا بطاقتك غصب عنك وخد عندك بقي الضحك والكركعة على المنظر المخزى اللى انت طالع بيه فى البطاقة ...بعدها بشوية تكبر كدة وتحلو او تحلوى وتروحى بقي يا حلوة يا امورة تطلعى رخصة عشان العربية الحلوة اللى بابا جابهالك عشان محدش يعاكسك فى المواصلات بما انك زى القمر (سابقا) الا ان بابا يندم جدا على اللى دفعه فى العربية لما يشوف الرخصة وصورتك فيها لأنك لو بالمنظر دة يبقي اطلاقك فى الشارع بدون سيارة يعلم الشباب العفة ...طبعا السؤال الذي يطرح نفسه هو ليه كل ما اطلع حاجة تبع الحكومة تطلع فيها صورتى وحشةةةة؟؟؟؟ الحقيقة الملاحظة دى ملهاش الا اجابة واحدة هى ان الحكومة عايزة تقنعك ان المشكلة فيك وانك مش شايف نفسك صح وانك وحش يعنى وحش... تلبس حلو تحطى مكياج بررررضه قرررف. شعب بالمناظر دى وبيضحك على نفسه وبيجمل لنفسه واقعه يبقي كذاب فى افترائاته ولا لأ؟؟؟ بنت صاحبتى كانت رايحة تعمل بطاقة وقالت تضحك يمكن الصورة تطلع حلوة لكن هيهات اول ما ضحكت راحت اللى بتصورها دكت المكتب دكا وقالت لها بعنف : انتى رايحة عيد ميلاااد بتضحكى ليه ؟؟؟ قلت اضحك انا بقي عشان صورتها طلعت شماته بصراحة يمكن شكلى يطلع حلو وبعد ما طلعت البطاقة لقيتنى عاملة زى ميكي لما فمه بيفترش على وشه الى ما لا نهاية ....قلت خلاص بلاش ضحك جيت اعمل الرخصة ادتها بوز ولبست ازهى الالوان عندى وعملت اللالى وبعد ما اتصورت فى المرور عرفت ان الصورة هتطلع بالالوان فرحت اوى لكن بعد ما شفتها انتطلق منى صرخة مدوية ااااه يارتها كانت ابيض واسود ...وساعتها اقتنعت بوجهة نظرى. بطاقة ..رخصة ..ابيض واسود ..الوان برضه وحش ...يا شعب صدقوا بقي وحشين والله وحشيييييييين يعملولكم ايه اكتر من كدة عشان تقتنعوا بقي

تحب تحلل شخصيتك ؟؟؟

2008-07-13T04:39:00.000-07:00

من فضلك ...افتح رئتاك على مصرعيها واستنشق كل الهواء اللى فى المنطقة انت بصدد القرأة عن نفسك ..انه بوست نفساوى بحت سكووووووووت هنحلل بس بطريقة جديدة هنحلل شخصياتنا باستخدام الاشكال الهندسية فمن فضلك اجرى انظر للاشكال الموجودة اعلى الموضوع؟؟؟ الخطوة الثانية اختار احب الاشكال الى قلبك واول ما جذب عينك عند النظر الى الاشكال.. ..

واليك التحليل

اذا اختارت شكل المربع انت اذا الشخص الاكثر تنظيما وتحفظا وتفانى فى العمل وتحب دائما ان يكون كل شئ فى المكان الصحيح وفى الوقت الصحيح... ولكن المربعه منعزل بعض الشئ ومقاوم للتغير..فى عمله منظم وملتزم فقط اعلمه بالمهمة ليقوم بتنفيذها ولكن لا تنتظر منه مبادرة بالتخطيط كما انه يتجنب الصراعات فى العمل ولكنه ان اصبح رئيسك فلا تستبعد ان يدقق على خط كتابتك للتقارير لانه كثير الاهتمام بأدق بالتفاصيل..اما فى حياته الشخصية فهو الشكل الاكثر جدية فالمربع لا يعرف او تعرف العلاقات ..فقط الزواج وان كانت الزوجة مربع
فهنيئا لزوجها ان كان يحب الادخار ولا يقلق بشأن الميزانية ولكن ..عليه ايضا ان يتحمل قلة انواع الاطعة فالمربع لا يجيد تنوع الاصناف المطهية. وفى تصميم المنزل المكتبة ستكون اهم اركانه حيث ان المربع مولع بالقرأة وعادة ما يخصص لا وقت معين ..واخيرا لزوج المربع نتنمنى لك قضاء اجازة سعيدة فى المنزل حيث انها متعة المربع!!
اما المثلث , فهو مشهوربالحسم والنجاح كقائد لأن تلك السمات هى بالفعل اهم سمات المثلث فهم دائما ما ينظرون الى قمة الهرم طموحون..منافسون وبحبون اتخاذ القرارات لذا فهم مناورون سياسون جيدون غير ان الجدال معهم غالبا ما يكون دون جدوى فهم متمسكون بارائهم –وان لم تكن لديهم بينة- وللاسف نفعيون شيئا ما.....كما ان هدفهم الاول هو ان يكونوا اعلى من الاخرين فحسب لذلك تجدهم غالبا فى مواقع قيادية , والشخص من نمط المثلث تجده دائمة على استعداد تام المتعلقات..النقود..الكروت..كله موجود احتياطيا ومن اهم مميزاتهم هى انهم مثل المربع يقرأون بنهم و لا يفوتهم قرأة كتب النكت اذ انهم يحبون الفكاهة ورواية النكت ولا نستطيع جميعنا ان ننكر فضل المثلث علينا فى خوض المخاطر بالنيابة عنا ولذا علينا احتمال تعصبه او تعليمه كيفية واهمية الانصات للاخر واخيرا انظر فى عين المثلث عندما تود التحدث اليه لانه يعتمد (بنظراته الحادة الثاقبة) فى التواصل بالعين بنسبة 80 بالمئة ..

اما كان هذا الشخص يخوض تغيرا ما او مرتبكا عموما فى اسلوب حياته ولا يمكنكم التنبؤ بافعاله فانه غالبا سيختار المستطيل .. انه ذلك الباحث المثير الشجاع ولكن احذر..انه غير صادق او بشكل اخر يحب التمثيل فهو الاصلح ليكون مؤد مسرحى/سنيمائى/موسيقي والمستطيل شخصية تتسم بالنسيان و وضع الاغراض فى غير اماكنها والعصبية والحضور فى غير الميعاد كما انه شخصية كثيرة التقلب والتغير ولكن ان كنت زوجا للمستطيل فلا تحرمه من الاستقرار فى المنزل لانه يمر بحالة جيشان عاطفى والمنزل هو المكان الوحيد الذى يجب ان يحفظ توازنه.. ما يميز هذا الشكل عن غيره هو انه مرحلة انتقالية يمر بها الجميع عندما يكونون فى حالة تحول وعدم استقرار وخاصة المربع حيث انه الشكل الاكثر قربا منه(المستطيل) والذى غالبا ما يمر بهذه المرحلة بعد تفانيه فى العمل وعدم تقدير هذا الجهد.....

وعناق كبير ممزوج ببعض القبلات للاشخاص الذين سيختارون الدائرة ...انهم المحبون الاكثر عاطفية وكرم, حقا هم الاكثر اهتاماما بالاخرين وحبا ايضا يؤمنون بأن رسالتهم فى الحياة هى جعل الاخرون سعداء, وذلك لأن اعتقادهم ومبدأهم "عامل الاخرين كما تحب ان يعاملوك ... والدائرة لانها شكل يدل على الانسجام و التناغم ..فان كان لديك مشكلة او تشعربألم فتوجه فورا الى صديقك او قريبك او زوجك اذا كان دائرة فبحكم كونهم افضل المتواصلين نظرا لقدرتهم على الانصات فهم يقيمون بسرعة التعاطف مع الاخر لذلك الشخص الدائرى يشعر معك حقا بالامك ويدعمك حتى تعود لصحتك لذا فبطبيعة الحال ينجذب المتألم للدائرى عندما يكون لديه مشكلة ولكن على الشخص الدائري ان يحذر عواقب تسامحه الزائد عن اللازم حيث انه لا يجيد التعامل مع الصراعات حيث يكون هو المستسلم الاول..التسامح ليس عيبا ويكسبك شعبية وحبا من الاخر ولكن تأثيره السلبي هو فقد الشخص احترامه لذاته بالاضافة الى احتمال استغلاله من قبل متصيدى الفرص والانتهازيين...ولكن هذا لا يعنى انهم اغبياء أويمكن خداعهم بسهولة فالدائريون يجيدون فهم الاخر جيدا ولكنه ودود ويحب ان يقدم الاخر عليه فالبرغم من انه متسامح مع الاخرين فهوليس بهذا القدر من التسامح مع نفسه ولائم لذاته.

الدائريون كما تصفهم د.سوزان "الصمغ" الذي يحافظ على تماسك العائلة وفريق العمل ,ولكن تقديرا لرقتهم وحنانهم احذر ان تروى امامهم قصة مأساوية او ان تجرحهم بدون قصد نعم سوف يسامحونك ولكنهم ايضا سينجرحون كثيرا فهم اكثر الاشخاص حساسية ورقة ويهتمون بالمشاعر ولكن لا يجعلك حبك لهم وثقة بهم تتسرع فى اسناد القيادة اليهم فهم افشل ما يكونون كقادة لأن الحسم لديهم امر منسي ورغبة الاخرين هى مقدمة اولوياتهم ايضا ويتجنبون اتخاذ موقف حازم الامر الذى يؤدى الى انفلات زمام الامور من ايديهم وبالتالى قد ينهار البنيان, فالرقة والعواطف ليست دائما فى صالح صاحبها ومن حوله.....الا انهم ايضا لديهم قدر هائل مما يمكن تقديمه لهذا العالم.....

ومتعرج(زيجزاج) يعنى ابداع فسوف تلاحظ بسهولة ان الاشخاص الذين يفضلون الشكل المتعرج هم اناس مبدعون يحبون الخروج عن المألوف وانتاج الجديد من افكار لذلك تجد المتعرج دائم قول "ماذا لو؟!" فهم على عكس المربع فى كل شئ فالمربع تفكيره خطى صارم أ ب ت ث اما المتعرج فيقوم بوثبات ادراكية اى من أ الى و لذلك فكثيرا ما يراهم الاخرين غير واقعيين فى منظورهم للحياة و ينظرون اليها من الابراج العاجية .. بل انهم ايضا اكثر الاشكال اثارة فهم ما ان يتوصلون الى معلومة او خبر حتى وتجدهم مثل الشرارة ينتشرون ليشعلوا الحماس فى الاخرين... ولكنهم ايضا حساسون.. اذكياء لديهم من البهجة والمرح ما يجعلهم محط انظار واستمتاع لاخرين فى التجمعات والحفلات ..نعم فالمتعرج شخص عادة ما يكون جذاب!! وفى الحفلات يكون بظرفه وبراعته وسرعة بديهته نجم الحفل او التجمع كما انهم اشخاص مستقبليون وعيناهم دائما على ما تحمله الايام و متطلعون الى المستقبل لذلك فهم يقضون وقت طويل فى احلام اليقظة غير انهم ...غير منظمين احيانا وغالبا سوف تجدهم يبحثون ويقولون "اين" لأنهم فاقدين لاغراضهم دائما بسبب نسيانهم لذا لا تتتعجب من المتعرج اذا رأيته يبحث عن نظارته فى حين انه يرتديها!!! ولكن احذر ومراعاة لكونهم اشخاص متمردون ... لا تحاول ان تكتفهم او تحجمهم لانك لن تستطيع فالمتعرج لا يمكنك كبح جماحه وان كنت مربعا او ماشابه من الاشكال الخطية فبالتأكيد كنت احدثكم عن ذلك الذى ترونه غريب الاطوار

ربما يكون احد ضحايا الاختبار السابق بمواصفات شكل ما غير انه اختار شكل اخر ولكن راقب جيدا انه الان غير ماكنت تعرفه قبل بعض الاعوام حيث تقول د.سوزان (وهى بالمناسبة مؤلفة كتاب التواصل رغم اختلافتنا وصاحبة نظرية التحليل بالاشكال الهندسية) ان هناك حالات تؤدى الى تحول الشخصية من نمط لأخر سواء كان ذلك بوعى او بغير وعى المربع مثلا من الرجح ان يتحول الى مثلثا فبعد ان كان تابعا يصبح قائدا مثلثيا ..او ان يتجه نحو سمات اكثر دائرية اذا ما مر بظروف افاقت بداخله الشعور بالحاجة للمودة الانسانية اما المثلث ففى السنوات الاخيرة له يبدأ فى الاسترخاء وتعلم الاستمتاع بالحياة بشكل اكثر اكتمالا لذلك نجد روح الدائرة قد سيطرت عليه اما المستطيل فما انه فى حالة انتقالية من الاساس فى حالة تحول مستمر فلا مجال للتحدث عن تحول نمط شخصيته والدائرة بعد ان يدرك انه كان شمعة تضيئ للاخرين حتى احترقت يقرر ان يبدأ فى الاضاءة لذاته والاستفادة بنفسه وهنا تكون نقطة التحول وهناك ثلاث مراحل فى تطوره محاكاة لثلاثة اشكال اخرى , المرحلة الاولى الى المتعرج ..الثانية المربع والثالثة المثلث... اما المتعرج فتحوله امر مستبعد بشدة لن نظرا للنزعة الابداعية المسيطرة على طريقة تفكيره ورؤيته للحياة فهو متنوع ومتغير بطبعه..و فى النهاية ننصحك كما تنصحك د. سوزان كن مربعا لرئيسك...دائرة لزملائك..مثلثا لمرئوسك ولشريك حياتك متعرجا....

لو لم اكن مسلمة لوددت ان اكون مسلمة

2008-06-23T05:34:00.000-07:00

رضيت بالله ربا وبالاسلام دينا وبمحمد صلى الله عليه وسلم نبيا ورسولا ...كلمات قد ينطقها لسان ويخدع قلبا فيوهمه انها نابعة منه ...ولكن ما اجملها حينما يكون قولها نابع من رغبة عارمة فى قولها..حينما يصافح عقلك قلبك فيقبّلا لسانك ويرجواه ان ينطقها باعذب صوت ...فيرجو لسانى قلمى ويدي فى ان يشرحا سر ما قاله وليعرّف كل من قالها فى يوم دونما يشعر بها ان الشعور بها لهو اجمل واروع من قولها بلسان فقط ....
حدثنى عقلى فقال...ارئيت ان ربك هذا هو من لم يمل من خطأ البشرية فلم يكتف بانزال الدين واخبار بنى ادم بالحق ..فجعل النزول تنزيلا ينزل اليهودية على قوم ما عرفوا الله قط وما عرفوا لدينه سبيلا..الا ان هؤلاء القوم عرفوا الحق ولكن لم يعرفوا تطبيقه على الوجه الامثل فراحوا يقتلوا فى بعضهم ويخدعوا نبييهم ويتحدوا ربهم ...لم يمل الله (حاشا لله) فينزل المسيحية بما بها من رقا قلب وصدق عواطف وعرفان للجميل ليعلم بها الخلق كلمات كانت غائبة عمن قبلهم (الله محبة) اراهم الله الكون من منظور جديد عرفهم معانى ما كانوا يأبهوا لها او يقيموا لها وزنا من قبلهم علاقة الانسان بالانسان (بعدما قال اجدادهم ..لن نصبرعلى طعام واحد ولا شراب واحد) فأتى بنى المسيحية ليجمعهم على مائدة واحدة ...ليعلّم قلوبهم معنى الحب ومعنى الحياة فى ظل مشاعر تجمع بين الانسان واخيه بل بين الانسان والكون .... ثم اتى الاسلام -ورضيت به دينا لأنه...- اتى فى الوقت المناسب على القوم المناسب وبالرجل والمناسب وبالقول المناسب بل الجميل والبليغ ...اتى بقوله اقرأ ..اتيبنبى يقول حب لاخيك ما تحبه لنفسك ..اتى برب يقول واعتصموا بحبل الله جميعا ..اى اتى ليجمع ما بالحياة من معانى بالحب بالخلق بالعمل بكل ما اوتى به من قبل الانبياء وهنا رضيت بمحمد صلى الله عليه وسلم نبيا ورسولا بل حبيبا واب واخ وروح كم كان خير من يقتضي به امرأ .... ليامر بالرحمة والعمل وعبادة الله حق عبادته وقد قصد فى حق العبادة ما كان يفعله هو وقد مكنه الله كان لا يمضي يومه دونما يقدم للارض جديد ويقبّل جبين اخيه المسلم بقول لين ولسان رتب بثوب يخلعه ليهبه لمحتاج بل لمشتاق ...و ابتسامة يرسمها على وجهه للعالم وكلمة حق يقولها دون هوادة ودونما تأخذه الرأفة بعيدا عن الحق ..فيقولها لجائر.. لمخطئ ...لمقصر ..جاء رسول الله ليهب للمتسول فأسا ويأمره بالحرث بدل من الشحذ ...قد يظن احدا اننى التقط من كل بستان زهرة ولم ارسم صورة دقيقة لرسول الله ولكننى اقول انما هى ازهار اقطفها من بستان واحد الا وهو بستان الحياة فطنها رسول الله ونشرها على العالم من فوق غار يطل على شبه الجزيرة العربية.
قلت اتى فى المكان المناسب... نعم اتى على قوم كانوا فى امس الحاجة لدين يقول لهم (وان تكن فظا غليظ القلب لانفضوا من حولك) بعدما كانوا يتقاتلوا من اجل الكرامة والمال والشهوات ...ليقول لهم(مثنى وثلاث ورباع) بعدما كانوا يتزوجون بعدد ما يذبحون من الشاه لاكلها فيتزوجون عشر ..اثنى عشر وربما عشرين وفى هذه الكلمات الاخيرة ارد بها على من اتهم الاسلام بالشهوانية فاقول بلى لقد جاء الاسلام ليحد من تلك النزعة ولكن الحد لا يعنى القطع ...جاء على لسن عمر عندما قال لرجل فى السوق(اوكلما اشتهيت شيئا اشتريته؟؟) ضاربا على رأسه ....
نعم رضيت بالله الكريم العظيم الذي لم يمل من انقاذ البشرية وتعليمهم اسرار الحياة والوجود وكرمهم فاسماهم لملائكته(خلفاااااااء) انى جاعل فى الارض خليفة...انا خليفة وانت خليفة ولكن لمن ...انى رضيت بل رجوت وتمنيت ان اكون لله..فيكون الله ربي ..وقدانزل دينا يلخص ما فى الاولين والاخرين يعلمنى ان هناك ربا وانى عليا عبادته كما قال موسي لقومه ..يعلمنى ان عبادته تكون بالحياة كما يرضى وبحب كل شئ حولى ابتداء من اخى وانتهاءا بنسماتٍ تكرمت فدخلت الى رئتاى تماما كما علم عيسي(عليه السلام) امته يعرفنى انه ما خلقنى لامكث فى معبد اتعبد له بالصلاوات دون الضرب فى الارض واعمارها ولا للضرب فى الارض بدون ذكر وجود الله وخشيته فى ادائي -(ان الله يحب اذا عمل احدكم عملا ان يتقنه)-والعطف على الفقير ومساعدة الغير ليهدينى كتاب فيه سر الحياة وسير الاولين وينبئنى بما هو قادم ويشرح لي اسرار خلقه الذي لا اعلم به منه فهو الصانع وهو المعلم ...انه دين الاسلام فرضيت بل فخرت به دينا ...واذا برجل يعد نموذجا للانسانية بكل ما تعنى الكلمة ليحمل لنا هذا الدين فرضيت به رسولا .... واشهد الله اننى رضيت به ربا جليلا كريما عظيما وبالاسلام دينا حنيفا قيما شاملا وبمحمد صلى الله عليه وسلم رسولا عالما معلما فاضلا عطوفا .....

الى هنااااااك ....

2008-05-23T08:11:00.000-07:00

....مفيش فايدة

سئمت اذنى من شر ما سمعت ..احاديث تافهة ووشاية ضالة من نساء ..كذب وخداع من رجال فقررت الا تسمع مجددا على تلك الارض ...ثم اتى دور العين ..اذبهلت من هول ما رأت دم وشجار ونخرا فى الممنوع فأبت ان ترى

مجددا على تلك الارض ...فجاء عقلى ليمارس عادته ليلا الا وهى التفكير العميق فوجده يغشاه احداث النهار ممرات سوداء مليئة بمخلفات الايام مما سمعت الاذن ورأت العين ..ولكن .... بريقا من نور تجلى من بعيد ..انهم اصحابي واخرون عرفتهم على تلك الارض مثلهم كمثلى ... اعتراهم ما اعترانى فاتفقتا حواسهم وحواسي على الاعتصام والاضراب عن العمل وشاركهما الموقف ذاته بقية الاعضاء فلا هم قادرين على العمل بدون العقل والعين والاذن ولا هم يجدون راحتهم قدم تمشي على الاشواك وصدر تغذيه عوادم السيارات والمصانع وقلب بكى على اصحابه الاعضاء وعلى نفسه مما رأي من البشر ..فأتى لنا طبيب الحياة كى يطببنا ولم يصف لنا دواءا غيرها ...غير الجزيرة انها على الجانب الاخر من البحر جزيرة خالية من كل الناس الانا نحن خالية من الخبث والمكر والشر والتلوث لا تسمح لغير الخير والفضيلة للوجود تماما كالمدينة افلاطون نصحنا بها الطبيب وجد فى نصحنا حتى اننا ايقنا انها العلاج ...وبسرعة بدأنا بالاستعداد فليس لدينا من الوقت كثير ادوات لبناء البيوت ...مطبعة و اوراق واقلام لن ناخذ مياه فهى ملوثة ولاطعام فهو مغشوش حسبنا الاسماك ومياه البحر بعد معالجتها ومحراثنا لنزرع به والاهم الاهم قاربنا الذي سينتقل بنا من العالم الملوث الى عالم الفضيلة وبعد الوصول..يا الله!!! راحة ما بعدها راحة وكانها الجنة لولا اننا بشرنا بانها لا ولن تخطر على بال بشر..ولعلك تسأل عن صنيعنا بالورق والاقلام والمطبعة ..فبما ان اهل الجزيرة من اطيب البشر فقد لاشفقوا على اهل الارض الاخرى واشتاقوا اليهم رغم شرورهم فودوا ان يكتبوا لهم فى جريدة عن حالهم عسي انهم بذلك يشحذوا هممهم ...فنرسل نحن اهل الجزيرة فى قارب الي اهل ارضنا الاولى جريدتنا التى نأمل بها فى صلاح احوالهم
هلّ القارب عليهم وبه اعدادا للقراء ولن بداخل الجميع الخير مهما كان به من شر هفت نفوسهم بعد القرأة الى الوجود وسطنا واشتاقوا لأن ينعموا بحياة نظيفة مثلنا ان ياكلوا من الثمار اليانعة الحقيقية لا كما يأكلونها مغشوشة مهجنة ...لرؤية الالوان كما خلقها المولى فى زهوها وجمالها لا كما طغت عليها شرورهم فى ارضهم فبات الابيض رمادى والاحمر بنى والوردى اسودا استيقظ الخير بداخلهم وقرروا الا يعود القارب الينا فارغا قرروا وفى نفس واحد ان يعودوا هم فى القارب الينا ولكن...

من يركب اولا ؟؟!! الجميع ..ود الجميع لو انه الاول فى القارب قبل اخيه لو انه ينعم بالخير دون الاخيرين
غرق القارب ..غرق القارب فانه ان يحمل جبلا لن يحمل شرا مع الخير هيهات لهم ان يجتمعا ثقلت فعلتهم قبل اوزانهم على القارب وكان ذلك من اهم اسباب حرمانهم من الوصول الى جزيرة الفضيلة ....

مشروع وطن ..فى كتاب

2008-05-14T13:56:00.001-07:00

واخييييييييييرا ..تم بحمد الله نشر العدد الاول من سلسلة دون والحمد لله كانت مدونتى من وسط المدونات المنشورة فى السلسلة او يعنى بعض التدوينات منها ...تدوينة مشروع وطن لو تفتكروها .... وبهذه المناسبة السعيدة جداااا ادعوكم لحضور حفل التوقيع والذي سيكون يوم الخميس (22/5/2008) فى مكتبة عمر بوك استورز الساعة6ونص اوعوا تتأخروا مستنياكم والدعوة عامة هات اخوك واصاحبك وزمايلك والدعوة للمدونين وغير المدونين وبعدين عيب اوى لما نتقي مدونين ومنحضرشششش ونردهالكم فى المدونات ان شاء الله

جربت توزنها ؟؟؟

2008-05-08T08:32:00.000-07:00

تخيل انك برجل واحدة؟؟ او بعين واحدة ؟؟ يا تري هتكون ايه المشكلة؟؟ المشكلة هى انك لو برجل واحدة هتقع عشان مفيش توازن ولو بعين واحدة هتشوف جانب واحد بس وهتحتاج تتحرك عشان تشوف الجانب التانى ..طيب يا تري احنا من جوانا شايفين كل الجوانب وعندنا توازن؟؟؟ وازاى نحقق دة ؟؟
السؤال دة جاوب عليه الرسول عليه الصلاة والسلام وكالعادة تبعه فى ذلك علماء التنمية البشرية حينما ظنوا انهم اتوا بجديد عند قولهم ان الانسان يجب ان يحقق توازنا بين جوانب الحياة الاربع (الروحي, الاجتماعى, الشخصى ) والشخصى ينقسم الى جزئين هم( الجسدي والعقلى ) ولكن سبقهم فى ذلك الرسول صلى الله عليه وسلم فعن الجانب الروحى قال ( ان لربك عليك حق) والجانب الشخصي بشقيه قال( ان لنفسك عليك حق وان لبدنك عليك حق) والجانب الاجتماعى قال(وان لاهلك عليك حق) وعن تحقيق التوازن قال فاعطى كل ذى حق حقه....- قد لا يكون نص الحديث بهذا الترتيب ولكنه يشمل تلك الجوانب- , وهنا ياتى السؤال هل تعطى لكل ذى حق حقه؟؟؟
احيانا الانسان بيظلم جانب عشان خاطر جانب اخر فمثلا يهتم اوى بنفسه فينسي الناس والمجتمع واصحابه واهله او انه يهتم اوى باهله وناسه فينسي نفسه او انه يعمل الكارثة الكبري واللى هتحدث اكبرخلل للتوازن بداخله.. انه يهتم بعمله واهله ونفسه ويقول مهو دة اصل الدين مهو الدين مش بس عبادة وتوبة وصيام ودروس وقرأن, الدين عمل واخلاق ومعاملات ...فعلا الكلام دة صح ومش بس صح دة صح اوى اوى اوى وانا واحدة من الناس دايما بقول كدة بس الخوف لحسن رضايا عن نفسي يخلينى اهمل بقية الجوانب يخلينى انسي اوقات الصلاة يخلينى اهمل الارتقاء بثقافتى الدينية زى ما انا عمالة اقطّع فى الروايات يخلينى انشغل بالظل عن الضياء ايوة انا وانت بنشتغل ونتعب عشان خاطر ربنا وعشان ربنا خلقنا نعمر الارض مش نأكل ونشرب وننام ولا برضه عشان نمكث فى المسجد ايام العمر كلها بس المشكلة ان الانهماك فى الحياة العملية لو نساك ربنا هينسيك انت بتشتغل ليه اصلا ؟؟؟ ودى كارثة عشان كدا بنقول(ولا يشغلك ظل عن ضياء) انا ممكن اشتغل عشان اجيب فلوس لولادى دة الهدف الاول والاساسي لكن مننساش ان ابهات كتير اوى بدئوا كدا وانتهى بيهم الامر ان انشغالهم بشغلهم والفلوس نساهم اولادهم اللى هما اصلا بيشتغلوا عشانهم!!!! الفكرة واحدة والمشكلة ان اى شئ تراكمى خداع بمعنى ؛ الوزن مثلا لو انا انهاردة كلت حاجة بسيطة وبكرة حاجة بسيطة وبعده وبعده انا عمرى ما هحس وانا بعمل الحاجة دى انى بعمل كارثة فى حق وزنى لانها ..حاجة بيسطة... لكن بعد الشهر ..اتنين..ها؟؟؟ نقف على الميزان نلاقيه بيصرخ وبتالى انت كمان تصرخ ااااااااه... يا رب تكون فكرتى وصلت ...انا مش عايزة اطول عليكم بس ارجو كل واحد قرأ التدوينة دى يجري يجيب ورقة وقلم ويعمل تقسيم رباعى لاربع خانات ( الدين, الشغل والثقافة, الاهل والاصدقاء, الحالة الصحية والجسمانية) ها تقييمك ايه لنفسك فى كل خانة ؟؟؟ وهو دة بقى الميزان اللى هتقف عليه بعد انهماك فى الحياة ومرور الايام يوم بعد يوم لحد ما جه الاستوب...بس يا تري لما تقف بنفسك على ميزان حياتك هتلاقى التوازن عامل ازاى ؟؟وزنك هنا قد ايه وهنا قد ايه؟؟؟ ها هتصرخ زى اخينا اللى وقف على الميزان لقى نفسه 80 كيلو بعد ما كان 65 من شهرين؟؟؟ طيب من غير لت وعجن ...فى الصفحة المقابلة على طول يللا ابتدى حل المشكلة وحط خطة واقعية ومنطقية لضبط التوازن دة بسرعة عارف ليه؟؟ علشان... دقات قلب المرء قائلة له ان الحياة دقائق وثوانى .
بس خليك صريح وانت بتحاسب نفسك عشان الصراحة راااااحة

ززززننننن اغبي صوت

2008-04-08T13:58:00.000-07:00

ان ما انا بصدد الحديث عنه فى تلك التدوينة موضوع مؤرق ليس لى وحدى ولا لك وحدك انه موضوع مؤرق للعديد من المصريين فى الاونة الاخيرة ....وفى هذا الموضوع ننفرد بحوار مع المسئول عن هذة الظاهرة ال(غلسة) ....بعد هجومهم المفاجأ على مناطق المحروسة اجمع ....وبعد ما اشتكى منهم اهالى مصر كلها وانا اولهم ...انهم الناموووووووووووووووووووووووووس

لماذا هجمت علينا تلك السحابة الناموسية الفظيعة؟؟ ولماذا مصر بالذات هل من مفتى افتى للناموس اننا شعب فاضل فيه دم يتمص اصلا؟؟ للاجابة عن تلك التسأولات كان لنا هذا الحوار مع النموسة فنتيس .....

بعد ملاحظة للشعب المصري من تواجدكم بكثرة عندنا كثرت التسأولات ...ما الذي اتى بكم الى هنا؟*

فنتيس: سمعنا قبل كدة من مخابراتنا الناموسية ان الشعب المصري اليومين دول دمه فاييير و طافح الدم فوجدنا ان دمه اكيد هيبقى له طعم جديد منه سخن ومنه طفحان يعنى كتيييير غذاء انا حقيقي مش فاهمة احنا مضايقنكوا فى ايه؟امال فين الشعب المضياف اللى بيقولوا عليه

احنا: ما الاماكن التى تجدون فيها بغيتكم ؟

فنتيس: والله الاماكن الشعبية فى مصر كتير والحمد لله ودى حلاوتها بقى انها اولا محدش بيهتم بيهاوغنية باكوام الزبالة كما ان سكانها غير قادرين على شراء المبيدات

احنا : وما نوع المبيدات التى تخشوها وتعتبروها عدوا

فنتيس: ههههههههههه ماهو دة اللى مخلينا قاعدين عندكم جاتكم نيلة حتى مبيداتكم مغشوشة وريحيتها حلوة ...مش فالحين غير فى الحرب النفسية اللى عملينها علينا فى التليفزيونات وافلام الرعب اللى عملاهلنا شركات الروايح الحلوة قصدى المبيدات

احنا: وما الاماكن المحظور عليكم ذهابها؟

فنتيس: (فى رعب) ززززززززززننن بيوت معينة كدا لو دخلناها بنتفتش من على الباب ونلاقى الامن بيجرى ورانا مش بعيد نلاقى طيارة بتلاحقنا فعلى ايه بلا وجع دماغ

احنا: سمعنا ان بعضكم مجند لخدمة الحكومة ...صحيح الكلام دة

فنتيس : اما انك محاورة غلسة فكرينى ليكى عندى قرصة بعد الحوار ...بس عشان تتبطى هقولك ..بصي يا ستى بعضنا مجند فى الاقسام لخدمة الشعب

احنا: شعب هههههه على ماما؟؟!! انتى اتعديتى منهم ولا ايه معنى كدا انكوا بتبقوا قاعدين مع المحقق والضابط وكدة؟

فنتيس: ايه ؟؟؟؟لأ طبعا دة كان يفقعنا شخطة اقوى من المبيدات بتاعتكوا دى...احنا شغلنا كله من العساكر والامين هو يضرب واحنا نقرص..هو يضرب احنا نقرص لدرجة ان اللى منا مش بيقرص كويس الامين بيقرصه

احنا: بعض الاشاعات ترددت ان لكم علاقة بالمخابرات الامريكية....صحيح الكلام دة

فنتيس: اهو دة اللى هيطفشنا من البلد دى ....الفشر والفتى هو اى حاجة امريكا امريكا لأ طبعا مش معنى ان بعضنا تضامن مع المخابرات الامريكية لنقل تحركات الشعب من داخل حجرته حتى وهو نايم ان كلنا بنعمل كدة لأ اطلاقا ...شعب بيظيط

احنا: الا تخشون عربات الرش بتاعة الحى؟

فنتيس: ههههه ده احنا بنستناها دة منعشة اوى ....كلنا بنتجمع يومها عشان نشم دحنا ادمناها

احنا: منكو لله...مش صعبان عليكوا الشعب الغلبان دة هو ناقص

فنتيس: بلا نيلة انتوا فاكرين نفسكوا املة ...داحنا قاعدين معاكوا ونس بس وهو انتوا عندكم دم اصلا

احنا: بس فى دكاترة قالوا انكوا بتنقلوا الامراض

فنتيس: امراض هههههه هو انتوا ناقصين داحان كل مانيجى ننقل حاجة لحد نلاقيها عندوا ماهو دة اللى مصبرنا عليكوا على قرفكوا دمكم جميل ومليان مكسبت طعم اشي سكر واشي ضغط ولما بنحب نحلى بقى فيروس سي بيظبطنا

احنا:ومش ناوين تتنيوا تغوروا بقى

فنتيس: ما تتلمى بقى ...وعموما الحاجات دى احنا ملناش يد فيها لما الاوامر تيجى من فوق

احنا: ممممممممممم يعنى احنا مش عارفين ناكل ولا نشرب كمان مش عارفين ننام

فنتيس: والله مش مسؤليتنا وبعدين لازم يبقى في بينا وبينكم تعاون اكتر من كدة

احنا: وفى نهاية الحوار نشكرك على حسن تعاونك

فنتيس: وانا بشكركم على دمكم الخفيف وبوعدكم بمزيد من القرص

فاصل ونواصل

2008-04-03T17:10:00.000-07:00

كنت اود ان اطل عليكم بموضوع جديد من خلال تلك التدوينة ولكن للاسف انا انهاردة مش بكتب عشان ارغي انا بكتب

عشان اعتذر ...عن ايه؟ لا انا مؤدبة والله مشتمش حد ولا حاجة...انا بس بعتذرلكم عن الكتابة اليومين دول(ال يعنى الجماهير مقطعة بعضها)يعنى اصلى عندى بعيد عن السامعين وعقبال عند الدحاحين امتحانات ميد تيرم (منتصف الفصل الدراسي الثانى )واخخخخخخخخر حوسة اصلى من بتوع المذاكرة بعد نزول الجداول امال يعنى اذاكر ازاى قبل ما اعرف جدولى ؟؟اعمل جدول ازاى انا؟ برضه النظام حلو المهم عشان مطولش عليكوا بعد الامتحانات بقى هغرقكوا بس اتوصوا بيا شوية فى التعليقات بلاش نظام كر وفر اقرا واجرى على المدونة اللى بعدى دة.. انا بعرف من الكاونتر فى خونة بيقرأوا ومش بيعلقوا اكسبرس يور سيلف برضه ....انا عندى مواضيع لذيذة اوى كنت ناوية اكتبها بس معلش بقى الامتحانات علينا حق .....المهم بس انتوا ادعولى اعدى من القرف دة عشان احسن تقديري شوية اتشحورت التيرم الاول

وانتظرونيييييييييييييييي

حبيبى الذى لم تراه عينى

2008-03-20T08:40:00.000-07:00

احببه قلبى ولم تراه عينى ... فى يوم مولده اشعر ان الارض تكاد تنشق من الفخر ان احد مثله وطأها بقدميه الشريفتين ...اشعر ان الانهار تكاد تفيض شوقا لان تروي جسده الشريف ولكن للاسف اراه بقلبي يبكى... يقول اوبعد ما بذلته من جهد اوبعدما تحملت من الم اوبعد ما رفضت انطباق السماء وانشقاق الارض على الذين اذونى من اجل اجيال بعدى توحد الله اوبعد هذا كله تصبح امتى هكذا يتركون نهجى وينهجون نهج الجهلاء والعصاة والكفار ...اهان وهم مثل ما هم منهم من يلهواو من يعشق ومن يغنى لمعشوقته اومن يبكى ويصرخ من اجل لعبة مالهم لا يصرخون من اجل امتهم المهشمة ... علمتهم كيف تكون الامة قوية وجعلتهم بفضل الله اقوى امة اظهرت على الارض...وما ان مضت قرون قليلة الاو اصبح اعزة الارض اذلها ....اهذا المسجد الذي اسريت منه ؟؟ يدنس بارجل الصهاينة ؟؟؟ اهذا العلم الذى علمته لكم اهملموه وفطنه الكفار... ابى مصعب بن عمير ان تسقط الراية من يديه فقطعت يداه فمسكها بالاخري فقطعها له "العدو ايضا فضممها وكأنه يضممها بقلبه فقتل وانتم سلمتم الراية بتلك السهولة للاعداء......واخسارتاه

ولكننى اسمعهم ايضا يقولون له (فلعلك باخع نفسك على اثارهم ان لم يؤمنوا بهذا الحديث اسفا)ويقولون ايضا(وما على الرسول الا البلاغ المبين) فهون على نفسك يا رسول الله اقسم لك الا يطلع على امتنا شمس القرن القادم الا وتكون كما تركتها وربما قبل ذلك واقسم لك الا يهنأ لي عيش الا وان انفذ وصيتك واعمل جاهدةً على نهوض تلك الامة وليحاسبنى ربى على هذا القسم ...ولكن هلا سمحت لى ان القى فى حبك تلك القصيدة ......

احبيباه.... والله يعجز ان يصف حبى لك كلاما

ولكنه قلمى من جرى بدون اذنى عشقا لك وغراما

ويعلم ربي انى لارجو رؤياك ولو بمنام

يأبى قلبي الا تكون اليه احب الانام

اشتقت اليك وادعو ان تجري بل تهرول الايام

لألقاك واشرب من يدك عند بئرك يوم القيامة

ويالها من مكانة عطرة لا ينالها الا الكرام

يا خير خلق الله وارفعهم مقاما

يامن جعل للمسلمين مكانة بين سائر الاقوام

وانك لمن رسم لهم طريق العزة والكرامة

ولا اجد لهم حالا بعد هجر سنتك غير الهوان

قد قال مسيلم*مالنا ولهذا السبيل

!!اوليس سبيل العزة هو الاسلام

انبياه ...صلاة عليك من الله وسلاما

* مسيلم:هى تصغير مسلم لأن من يقول هكذا اقل من ان يوصف بالمسلم *

و بقيت بنت عشرين ...

2008-03-11T12:52:00.000-07:00

اليوم 11-مارس-2008 ...ركززززز ده يوم فاصل فى حياتى انتقالة من عقد لاخر ...ايوة انهاردة بقى عندى عشرييين سنةةةةة مش عارفة افرح ولا ازعل ولا اشجب ولا اندد...فكرت وقررت انى اعمل حاجة تانية ايه بقى؟؟ ارصد او اعمل جرد لا تقلق ..لا تقلقى مش هحكى العشرين سنة عملت فيهم ايه بس هعمل قسمة الحق..عشر حاجات حلوين وعشرة...مش ولا بد ....وهنا تقع الحيرة ابدأ منين؟؟؟

خلاص نبدأ بالحلو...احلى عشر حاجات حصلولى لغاية دلوقتى :

1)انى مسلمة وربنا دايما معايا

2) اول يوم دخلت المدرسة العيال صقفولى عشان انا الوحيدة اللى مكنتش بعيط

3) ودى بقى اللى هتوضح حلاوة رقم 2 , وهى ان اخر يوم ليا فى المدرسة العيال برضه صقفولى عشان كنت طالعة الاولى هيييه...اعتقد انهم كرهونى لانى مصدر قلق لايديهم

4)شئ ما عندما يحدث اعلم ان ما اتمناه سوف يحدث ....فاذا وقفت فى مكان وعينى دمعت وقلت نفسي ابقى هنا الحمد لله بوصل المكان دة ...بمعنى ...فى يوم كنت واقفة فى حفلة تكريم للاوائل فى المدرسة ...ونودى اسم الاول وطبعا(تصفيق حاد) بصيت على الاول وقلت يا سلام لو ابقى هنا السنة الجاية بالمناسبة كنا فى ثانوي وبالفعل العام التالى حصل وكنت الاولى واتكرمت وكذلك فى يوم كنت واقفة امام المسجد ووجدت حشد عظيم ..سألت هو فيه ايه؟ قالولى اصل هنا فى درس لمين؟ مصطفى حسنى ..وكان بابا ساعتها عامللى حذر على المساجد (ال ايه ارهاب بقى وكدة) وقفت مكانى وسمعت كلمات من مصطفى حسنى وعجبنى جدا موضوع الدرس...لازم امشي لان بابا هيهزئنى لو حضرت انا مقلتلوش...طيب اجى الاسبوع الجاى ..مش هيرضى ...بكيت فى صمت وتمنيت بداخلى لو كنت بداخل المسجد و بعدما ركبت السيارة نظرت للمسجد نظرة الجوعان لسوق الخبز...تلك النظرة التى لم تغب عن بالى الاسبوع التالى حيث كنت بالفعل داخل المسجد من المستمعين للدرس فتذكرت اننى منذ اسبوع كنت اشعر ان تواجدى فى هذا المكان شبه مستحيلا ...الله على الله

(5) الكلية التى كنت احلم ان ادخلها انا فيها الان والمهنة التى كنت تحلم بها عندما كنت ارى مسلسل عن الصحفيين انا اعملها الان ..بالمناسبة انا صحفية صغنونة او كنت صغنونة انا دلوقتى عندى عشريييييييييين سنة

6) اصحابى..اللى كتبت عنهم البوست اللى قبل قبل اللى فات انا بحبهم قوى وبعتبرهم من احلى حاجة حصلتلى فى حياتى لأنهم فعلا صحبة خير وربنا يخلينا لبعض يا رب

7) شئ جميل اوى انك تحس ان الناس بتحبك واحلى حاجة لما حد يوقفك ويقولك(فلان انا بحبك اوى ) من غير سبب كان يوم حلو اوى لما واحدة علاقتى بيها مش جامدة اوى ولقيتها بتقولهالى وبتقوللى معرفش ليه؟ انا من جوايا تمنيت ان السبب يكون رضا من ربنا يا رب يكون كدا فعلا

8) اول يوم نزللى فيه شغل كنت فرحانة اوى

9) ودى قصة مؤثرة اوى بس جميلة...فى يوم كانت عندنا فى البيت جارتنا وكان ابناه طفل كفيف وبعدين انا حبيت اشيله هو كان مازال ابن عام واحد ..لما شيلته شوية لقيته بيحسس على وشي امه قالتلى انه كدا حابب يتعرف عليا (دة طفل محدش يفهم غلط) بعدها امه خدته تشيله وانا قمت اعمل حاجة ..الجميل انى لما رجعت وقعدت وبدأت اتكلم وجه وشه نحيتى طبعا هو مش شايفنى بس عرفنى من الصوت

مامته قالتلى اتكلمى تانى كدا ...انا اتكلمت وقمت عشان اروحله حسس على وشي تانى وبعدين ابتسم ابتسامة جميلة ورمى نفسه عليا..كان احساس جميل اوى وكنت هعيط يومها لأنى فعلا بحب الاطفال موووووووووووووووووووت

ويمكن هو حس بيا عشان كدا نشا بينا الحب دة

10) فى رؤية جميلة شوفتها قبل كدا ونفسي تتحقق ...الرؤية دى والله العظيم شوفتها فعلا ...انا حلمت فى يوم بأن هناك

بيت عتيق امام المسجد الاقصى وكان المستولى عليه رجل ...شرير اشعث اغبر غلس وكلنا كنا بنكره وبعدين انا قلت فى

نفسي وانا ببكى اه لو الراجل دة يمشي من هنا الامة كلها هتستريح ..وفجأة لقيت رجل سمح الوجه مبتسم يعلو جواد و

يكبر وواقف امام البيت وبضحك وكأنه قد حرره بالفعل انا سعدت جدا وكبرت معاه و هو دخل البيت وهنا كانت

المواجهة واجه الرجل المحتل وقاللوا ان البيت دة بتاعه وانه اخده خلاص وقاله اطلع بره بس هو عصلج ..وهنا بقى

دورى فى الحلم اللى انتم اكيد هتسموه فيلم انا بقى حسمت الموقف وطلبت من كل واحد يكتبلى فى ورقة هو يرشح مين لملك البيت....

بسسسسسسسسسس

اما بقى اسوأ حاجات حصلتلى

1) لما كنت صغيرة كنت فاشلة جدا ومش واثقة من نفسي وملييش اصحاب كتير

2) كنت غلبانة اوى وسهل جدا حد يجى عليا او يستهفأنى مع انى مكنتش غبية

3) مرة عيطت واتفطرت من العياط على حاجة وبعد ما خلصت عياط ودمى وقلبى اتحرقوا اكتشفت ان الحاجة دى محصلتش!!!اتفقعت

4) كان ليا صاحبة بحبها اوى وبعد مدة من صداقتنا اكتشفت انها مصحبانى مصلحة وانها بتاخد ومش بتدى يعنى مثلا هاتيلى كذا اعمليلى كذا ولما فى يوم احتجتها اوىىىىى اتخلت عنى بشكل بشع وقعدت سنتين متكلنيش وبعدهم افتكرتنى

كتر خيرها كانت عايزة خدمة من بابا

5) فى مرة عملت عيد ميلادى زى انهاردة كدا ومحدش من اصحابى اللى عزمتهم جه ومكنش فيه فى العيد ميلاد الا انا وخالتى وبنت خالتى ...بصراحة اتألمت اوى وحسيت ان محدش بيحبنى وانى حد مهمش وقعدت اعيط اصلى بعيد عنكم

حساسة اوى

6) مع انى عندى اصحاب كتير اوى دلوقتى الا انى حاسة انى لوحدى ومليش حد اشكيله او افضفضله غير ربنا سبحانه وتعالى ولما بروح مكان جميل مصيف او حديقة او نادى حلو ببقى حاسة ان فى حاجة ناقصة عشان تكمل جمال المكان

ربما يكون شخص اخر يشاركنى جمال المكان....

7)فى مرة اصيبت بما اسميه انا ذهول عقلى من شدة التفكير ودى حالة بيفقد فيها الانسان معانى كل الاشياء وكانه مغيب

عن الواقع او فى عالم اخر ...كان احساس صعب اوى وكنت كل يوم ابكى من مرتان لثلاث مرات ربنا يكفيكوا شر الحالة دى

8) مرة جبت لماما فى عيد الام كارت و وردة.. رمت الكارت فى المطبخ وادت الوردة لاخويا الصغير يلعب بيها وطبعا اتدمرت واتدمر قلبى معاها مانا قلتلكم انا بعيد عنكم رومانسية اوى وحساسة بعته

9) لحد دلوقتى مش لاقيه انسان عدل يستحق انى ابصله جاتهم القرف كل اللى عرفتهم ياما كدابين او معندهمش دين او هايفين

10) فى بنت كنا قريبين من بعض اوى وعلى طول ...مع بعض من بداية ثانوى كدا لقيتها اصبحت المصدر الاول للقلق

فى حياتى ...سوء ظن دائم ونميمة عليا لما قطعت فروتى وممكن كمان مواقف سيئة معايا كل دة مش مهم المهم ان حاجة

زى دى تطلع من حد كنا فى يوم من الايام اقرب اتنين لبعض

واخيرا شكرا على تحمل قرأة التدوينة دى مع انها طويلة شوية ...وخدوا بالكم من التاريخ دة ....حدث فى مثل هذا اليوم ان ان ان اااااااان

ارهاب اليومين دول

2008-03-07T13:19:00.000-08:00

بطلوا دة واسمعودا...يبات مظلوم يصبح ظالم وعجبييييييييييييييييييييييي

هتلر كان احن

2008-03-03T14:28:00.000-08:00

تحدثوا عن مساواة الرجل بالمرأة...عن مساواة الابيض بالاسود... لماذا لم يتحدثوا عن المساواة بين طفل عربي واخر اجنبى ..احرام على الدوح بلابله حلال من كل نوع؟؟؟؟

اضحك قدر المستطاع ..فلو كنت فلسطينيا لعلمت ثمن تلك الضحكة
والله كان هتلر احن منهم ليته كان حبيب بلفر

شلة الهنا

2008-03-01T09:50:00.000-08:00

ياااه البوستين اللى فاتوا دول كانوا بؤس خالص معلش كان فاصل غلس شوية ...بس زى بعضه ادينا رجعنا للفرفشة

ايه اجمل حاجة فى الدنيا...ايه ؟البنات ؟لا يا قليل الادب..الاكل؟اه يا مفجوع ...برضه لأ الفلوووووس؟؟ لا برضه هى حلوة اه وانا بحبها هى والاكل بس برضه مش هما دول اجمل حاجة فى الدنيا ..اجمل حاجة فى الدنيا انك تبقى عايش مع بنى ادمين..انا عارفة ان الناس اللى حوالينا مش ضفاضع يعنى بس انا اقصد ان محيط الانسان يكونوا ناس صالحة وعلى خلق ودين ودمهم خفيف يعنى من الاخر صحبة طيبة ولذيذة وانا بصراحة لحد دلوقتى الحمد لله اصحابى من هذا النوع(الله اكبر يعنى )خمسسسسسسسسسسسة خمسة اصحاب يعنى ..والله هما اكتر بكتير بس انا بفضل كل بوست اتكلم عن خممممسة عشان ال...حسد مين قال كدة؟!! عشان مطولش عليكم ....هتقوللى وانا مالي باصحابك اما صحيح مدونة فاضية واحنا فاضينلك؟لا والله الغرض من البوست دى اولا تكريما لهن ثانيا اقرأ بس يمكن تعجبك

نبدأ بمين؟؟

اه... مش قدرة(متتريئيش عشان متتضربيش) اى كنت هقع...

دى بقى اشهر مقولتها لانها دايما محط سخرية منى والله مش لأنى غلسة بس اصلها ليها حركات كدة مينفعش الواحد يسكت عنها يعنى مثلا واحدة كانت هتقع واحنا معاها وشايفين احداث الواقعة ...لا لازم بعد ما ربنا ينتعها بالسلامة تقول فى دلال (اى كنت هقععععع)عادى بوسبوس براحتها .بس والله بت جدعة اوى ولذيذة اوى وبداخلها بنوتة مربعة جميلة ..هى فاهمة يعنى ايه متخدش فى بالك....واحلى حاجة بقى انها منظمة جدا وطبعا دة فيه فايدة ليا لأنى طول مانا ماشية هى بتنظملى دنيا شنطتى ونادى محفظتى وملاهى كتبى ...سكرررر مشروع طفلة وقف وفى نفس الوقت مشروع ام مفترسة ...بس المصيبة انها لما بتحاول تعمل نفسها شرسة بتبقى عاملة زى الكتكوت المفترس ....

اما بقى منة...فدى حكاية تانية ...اشهر المقولات يعععع ويا عينى وتؤتؤتؤتتؤتؤتؤ بعنف....والبوز اياه والضحكة الجميلة طبعا ازى هقولكم

منة دى عبارة عن قلب متحرك واكتر شئ بيحركها العواطف وبالتالى فجسمها كله انفعالات يعنى مثلا لو حاولت تقولها كلى او حتى شمى حاجة هى مش بتحبها على طول تلاقى وشها كله بيقولك يععععععع قرررررف بمعنى ملامح تشعرك بالقرف لأقصى درجة حتى انك تكاد تكره الاكل كله بصراحة بتحسسنى انى بقولها تاكلى ........؟؟ اما بقى لو كانت الاكلة على مزاجها ..يا بخته ويا هنا وسعده اللى ياكل معاها تلاقى عينيها بدأت تلمع والسعادة تغمر وجهها وتقفز من قلبها ....ويا عينى عليك لو اتعورت ولو حتى تنتوفة تلاقيها كادت ان تبكى وتقولك يا عيييييييييييييييينى !!!!! لدرجة انك ممكن تعيط على نفسك ..بس اوعى تعيكط لحسن دى ممكن تغرق المكان من الدموع ...بس مش معنى كدة انك تستهفأها وتحاول تضايقها ..لان ناهيك عن البوز الذى لا عوج فيه ممكن تلاقيها برئت ونطقت اسمك مع طبق الشفتين على بعض وخاف على نفسك بقى...اينعم ممكن تتهزأ تهزيئة لذيذة الراعى الرسمى فيها كلمة(غباء) بس والله عشر دقايق وهتلاقيها جاية تصالحك وتبوسك دة لو بنت بسسسسس ...من الاخر منونة دى جميلة جدا وطيبة لدرجة العبط

اما بقى سمووووور ..فمقولتها الشهيرة(لأ...وليه بالعكس...والصباع اياه بتاع التحذير) اوعى وشك

هى جدعة جدا والحمد لله دى الصفة الغالبة على اصحابى ...ومثقفة واولما عرفتها كنت حاسة انى باصة فى المرايا بنت طيبة جدا ولذيذة جدا معارضة اوى اه بس معارضة دمها خفيف ...

... روكله كوم والفقى كوم تاااااااااانى يويو يويتى ايه العسولة سبيس تووووون

اد الكف وتقتل مية والف ...امال ايه احنا اى نعم شلة بنات بس وحوش وبالذات ايه فعلا هى لا تتجاوز الخمسين كيلو بس اللى يحاول يستفز عقلها او اخلاقها نهاره مطين بطين...مقولتها الشهيرة الله المستعان ودى بتبقى قبل الامتحان ...رؤوس اقلام ودى لما تسألها عملتى ايه..قدر الله وما شاء فعل ودى غالبا بعد النتيجة بالاضافة الى ابتسامة عريضة عند رواية المصائب ...ووجه به زمبلك يعمل عن رؤية منظر مستفذ فترى الانف والعينان وحواجب والفم اجتمعوا ليقروا لك ان هناك كائن خرافى يقف امامها خصوصا لو كانت بنت لابسة حاجة مش عاجباها ..فمن الاخر اللى عايزة تحتفظ بكرامتها تتلم وتلبس عدل وتبعد عن الولاد اللى ايه بتتأرف منهم (حاجة غريبة) عشان متشوفش تعبيرات ايه المضحكة وعشان احنا كمان منشتغلش يوم القيامة سيرفس فى وادى ويل اللى هيدخله كل همزة لمزة .... بس والله بنوتة زى العسل وبحب اسمع اسمي منها جدا ...(ياسمنتى)عمرى ما سمعته من حد قبلها .... جدعنة بسمة وقلب منة ودماغ سمر وفكر وتعبيرات ايه بيخلوا يوم اى حد قشطة .... وكفاية عليكم كدا الحلقة دى ..اه انا كنت قلت خمسة؟ لا دى خدعة هاهاها حجة بس عشان اخمس لحسن حد يحسدنى عليهم بس انا فعلا اصحابى كتتتتتتتتيييييييييييير وكلهم حبايبى ولهم بوستات قادمة بس برضه عشان ميزعلوش احب اهدى بوسة (نظام برنامج ما يطلبه المشاهدين)لكل من امانى وياسمين واسماء وايمان والاء وزوزو حبيبة قلبى وعبير وكللللللللل الناس محدش يزعل دوركم جاااااااااااااى جااااااااااااى

وحدى فى جزيرة الاحزان

2008-02-20T12:28:00.000-08:00

ايه رأيك فى المشاكل؟ عادى كل الناس عندها مشاكل....

طيب ايه رأيك فى الحل؟ عادى كل مشكلة ولها حلال....

طيب لما تكون المشكلة دى خاصة بنفسيتك؟....عادى الفضفضة هى الحل

طيب واما ميكنش عندك حد تفضفضلة تعمل ايه؟؟؟؟؟؟

فاكرين فادى خفاجة الطفل اللى كان فى فارس بلا جواد كان دايما يقول ايه(مفيش مشكلة عشان المشكلة حلها مش مشكلة يبقى ايه المشكلة مفيش مشكل....) مش كان بيقول كدا برضه اينعم اللى كان بيقول طفل لكن اللى كتب الكلام دة مش طفل وانا اؤيده وبشدة لانى اكتشفت ان المشكلة مش فى المشكلة فى حد ذاتها لكن فى حلها اذا كان صعب ولا سهل ...انا اؤمن تماما ان الحياة لازم يبقى فيها مشاكل والا هننتحر لكن اعتبرونى بهبهب... بفضفضضضضضضض لانى حقيقى معنديش اللى افضفضله وهى دى المشكلة عندى اصحاب بمعدل 2 لكل مليون نسمة عندى عائلة ولكن... برضه معنديش اللى افضفضله مش عارفة العيب فيا انا انى كتومة فى مشاعرى -مشاعري بس انا رويتر اصلا وميتبلش في بقى فولة بس عند المهم اللى هو المشاعرالكتمان كله حاجة تفقع!!- مش عارفة بقى هى دى المشكلة ولا المشكلة انى مقبلتش لحد دلوقتى اللى يعرف يحتوينى ويطلع الكلمة من بقى انا اينعم كتومة بس اللى يعرف يفتحنى مش هيعرف يقفلنى .. حنفية بعيد عنك .... الحمد لله الذى عافانا مما ابتلى به غيرنا والله عارفة وبقول كدا بس المشاعر المؤرفة دى طرشة مبتسمعش ...اقول انا فى نعمة ...غيري فى وضع انا مقدرش استحمل حتى اسمعه برضه مفيش فايدة بلاقى الدموع بتقوللى سيبينى بقى حرام على اللى خلفوكى

بس حقيقى اللى عايز يحس بيا يتخيل نفسه فى جزيرة لوحده لا لاقى اللى يكلمه ولا اللى يساعده ولا اى حاجة انا تقريبا كدا بس قلبى بس انا الحمد لله لدى معارف واصدقاء جمال جدا ونعم الاصدقاء والله افضل بنى ادمين موجودين على وجه البسيطة بس عند المشاعر وحدى على جزيرة الاحزان ....اه بمناسبة الاصدقاء ترقبوا تدوينة عن صديقاتى العزيزات

عقبال ما الاقى لقلبى صديق

معلومة*: انا انسانة متفائلة جداااااااااا ازاى معرفش مع انى طالع عين اهلى بس برضه شعارى الحياة حلوة ..هيهئ نكتة دى .....

عزيزى قلبى...

2008-02-07T12:26:00.000-08:00

كتبت صديقتى مدونة (مش قدرة )عن العقلانية والعاطفية والصراع العقلى القلبى ..فكتبت لها تعليقا يشير الى ان المشكلة بسيطة جدا ولها حل...عادى ..ولكننى بعدها توقفت للحظات وسألت قلبى ما رأيك فيما يقال احقا انت شاعر اننى اظلمك احقا انت بك ..لم اكمل الكلمات لاننى توقفت عندما سمعت صوت بكائه وقال لى وهو يبكى بانتحاب انسيتى احب الابيات الى قلبك:

يا مشرط الجراح أمانة علـــــــــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. و الفضل يرجع إليك
عجبي !!!

كيف شفت قلبي و النبي يا طبيــــــــــــب
همد و مات و الا سامع له دبيـــــــــــــب
قاللي لقيته مختنق بالدمـــــــــــــــــــــوع
و ما لوش دوا غير لمسه من إيد حبيب

عجبي !!!!

فكرت وعلمت الحكمة الاتية؛ من الممكن ان تساهم فى تقليل حجم المشاكل ولكنك لا تستطيع ان تبيدها واذا ابيدت ابدت انت الاخر بمعنى؛ من الممكن ان يتحكم العقل فى الاسباب المؤدية الى الاضرار سواء كانت العامة او الخاصة بالقلب ولكن هذا لايعنى ان القلب سيظل مطيعا فاذا قسنا الامر على الحكومة والجريمة مثلا ...من الممكن ان تتحكم الحكومة فى اسباب الجريمة كتامين الشوارع ومحاربة الفساد وما الى ذلك (دى الحكومة المثالية اللى زى مصر طبعا)

لكن مهما استطاعت ان تقوم بذلك لا تقول لى ان الجريمة سوف تنتهى الى الابد واللا لم يكن للعقاب تواجد فى الشريعة ولم تخلق رحمة الله الله تعالى يقول فى حديث قدسي للامانة لا اذكر نصه ولكنه بمعنى لو لم يكن هناك عصاه لاغفر لهم لخلقت خلقا جديدا ليخطيؤا واغفر لهم اذن فالخطأ لا بد ان يصدر حتى من اكثر الناس مثالية وهذا ما لا يدركه العقل او بالاخص الانا الاعلى (النفس اللوامة) ولكن يأتى دورنا هنا فى محاولة تصحيح الاخطاء والتوبة والتعديل بالاستمرار اى عندما يخطئ القلب ويدخل فى المحظور علينا ان نتراجع وبسرعة حتى وان كان ذلك سيتسبب فى تألمه ولكن كما يقال علقة تفوت ولا حد يموت او قضى اخف من قضى هذا هو دور العقل الذى لا يصح التهاون فيه فالقاعدة تقول اقتل الوحش وهو صغير...او الزرع الفاسد يجتث من جزوره قبل الينوع اعلم ان القلب ليس له اذن ولا عقل فبالرغم من ان الدراسات اثبتت ان القلب به مخ مصغر الا اننى تأكدت ان ذلك بيولوجيا وماديا فقط اى به مركز للذاكرة ..للانفعال الخ ولكن لا للفهم فمها قلت له لن يفهم وهنا يأتى ما يسمي جهاد النفس فقد سمى جهاد لانه يقوم على الصراع فلو كان للامر ان يتم سلميا فلما قيل جهاد اذن؟ كان سيسمى مصالحةاواتفاق من النفس ..نعم ذلك مطلوب ولا يجب ان يظل الانسان فى حالة صراع دائم مع نفسه لان الانسان فطر على تغيير الاحوال فيكون الصراع عندما يدرك المرء خطأه فى اى مرحلة سواء بدايته فيتقيه او بعد حدوثه فيتراجع عنه ولكن فليحاول بقدر الامكان السرعة فى اكتشاف المرض وعلاجه قبل ان يفوت الاوان ولكن فى اى حال من الاحوال لن يستطيع العقل ان يفرض تنفيذ كل ماادركه او قضى به ...واخيرا اود ان اقدم تحية لكل مجاهد لنفسه فهو الجهاد الاكبر وان اقدم اعتذار ممتزجا بدموع حارقة لقلبى..عذرا يا قلب تجرح جميع الاعضاء فى حياة اى امرئ وانت عضو والجرح عليك سنة وحق فتحمل و اعلم ان الله يعوض الصابرين اصبر الله معك و ليهون عليك علمك بما ستراه من نعيم عاجلا فى الدنيا( تعويض الله لك )وآجلا فى الاخرة فى جنان ليس لها اول ولا اخر بها ما اشتهيت وما تمنيت وللابد خلووووووووووود واليك تلك الابيات خاصة اذا نوى صاحبك اقتحام المجتمع والغوص فى بحار الحياة بعرضها

يا ماسكين على الجمر هنيئا لكم

فلتبقوا صامدين او تكونوا كغيركم

ممن خافوا مساسا بها فتورعوا

عزفوا عن الدنيا وعن الحياة اقلعو ا

واخرين القوا جمرهم لثلوجهم

سينعموا بها قليلا فى حياتهم

ثم اللهيب يأتى فيقولوا ليتهم

ما تركوا جمرا اللا كان فى ايديهم

جناتكم هى داركم بعد اللهيب الدنوى

فثابروا وجاهدوا نفسا ابت ان تنطوى

انتم ام جرى ابنها دخل فى سوق الزخرف

فاذا زاغت ابصارها فقدت نقاط الاحرف

ضاع انبها ولن يعد يا حصرتا على ما ذهب

فاذا فقدت فلذ الكبد ماذا ستصنع بالذهب؟

بلون نزيف العقول اكتب...بلون دماء قلمى الجريح

2008-01-08T17:25:00.000-08:00

قلمك..مش مجرد قلم!!!

البوست دة اعتبروه بداية لحملة قررت اشنها ضد الاقلام المسممة التى اشبهها تماما بالمأكولات الفاسدة التى تبيعها بعض او اغلب مطاعم التيك اواى مش مهم اللحمة دى طازة ولا لأ ..اهو كله يتاكل ومعدة المصرى تهضم الزلط..الا ان المبدا دة هين بعض الشئ بجانب ما انا بصدد الحديث عنه اذا اكلت اكلة مسممة فاهو غسيل معدة ونخلص لكن اللى انا شايفاه قدام عينيا فى مجالى ومن زمايلى مخاطرة اكبر من كدة بكتير ...عرفتوا انا بتكلم عن مين ..الصحافة حلمى الاول ال ايه قلت يمكن لما يبقى معايا قلم يبقى سلاح احارب بيه الفساد والذى منه البؤين اللى هيقولهوملك اي واحد جديد(فى الكار) صدقونى انا مش بكتب كلامى دة من فوق هضبة انا فعلا نزلتو اشتغلت فى اكثر من مكان ..واذكر ان اول مكان رحت اشتغل فيه كنت بقول لزميلتى اكيد احنا هنبقى اقل مستوى فيهم احنا لسه بادئين وقدامنا كتييييييييير بس هى ردت عليا رد ..اكتشفت صحته بعد كدة قالتلى مش حاسة كدة هما خريجين ايه؟؟؟؟ وهنا الف (شابوه) تعبيرا عن احترامى لزمائلى وزميلاتى المشتغلين بالصحافة بدون مؤهل جامعى لها(مثل كلية الاعلام مثلا) اكيد هى موهبة واكيد الكلية مش الفيصل بس برضه اكيد انا فى اعلام مش بدرس الاربع سنين ازاى اكتب خبر ولا تحقيق..زى ماهو اكيد انى برضه مش بدرس فزياء نعم ادرس اهمية الاعلام..فنونه..استراتيجياته ونظرياته ودة كلام ممكن اى حد يقرأه بس للاسف مش دايما او تقريبا مش بيحصل اصلا..ان صحفى مش خريج اعلام يعمل كدة..ودى فى حد ذاتها كارثة لان الكلام دة حقيقى مهم ...اللى انا شفته وعاصرته بين بعض زملائي يخلينى ابكى على اللى اتعلمته..حقيقى اول كلمة اتقالتلى فى الشغل(انسي كل اللى اتعلمتيه)وبكل بجاحة يعنى من الاخر دة سوق مش مجال اعلام وسلطة رابعة وقادة فكر والكلام دة ممكن فعلا يكون دة اللى احنا كصحفيين مقتنعين به وفاهينه ..لكن مين نبه القارئ..بين قاله انسي بقى واياك وحذارى تصدقنا يا عم دة ضحك على الدقون.....مين قال للمواطن.. للشاب.. للشابة مش كل اللى احنا نمجدهولك مهم...نعم احنا بنعمل من الراقصة نجمة والحبّيب عظيم المجرم فهلوى وكله عشان ..لقمة العيش كلمة من هنا على بؤ من هناك موضوع ..خلص..سلم ..اقبض..ويتحرق ابو القارئ على ام البلد على دمغة الجابوهم ...وفى النهاية اود ان اقول...ان كل ذى قلم سيسأل عما كتبه..لان من الاخر قلمك دة مش مجرد قلم...(ان الذين فتنوا المؤمنين والمؤمنات ثم لم يتوبوا فلهم عذاب جهنم ولهم عذاب الحريق) صدق الله العظيم

والبقية تأتى ان شاء الله..واللى يحب يشاركنى الحملة ياريت ايترك تعليقه

المفكراتى..اصحا يا نايم وحد الدايم ..رمضااااااااان جاااى

2007-09-01T14:54:00.000-07:00

كل سنة و انتوا طيبين رمضان على الابواب ها هتفتحولوا ازاااااااااااى؟!

مستعدين لشهر "النظافة" ايوة شهر النظافة انا عن نفسى بسميه كدة لأنى بحس انه بينضف روحى و ذهنى و قلبى من ارف السنة كلها ّّاو زى ماتقولوا كدة ريست من الشيطان الهى يتحبس ما يرجع تانى..قولوا امين

يا جماعة الشهر دة يعتبر فرصة الواحد يقدر يتخذ فيه كل القرارات اللى كان شوشو بيوزززلوا ويزعزعه لما يحاول يفكر انه يتخذها عشان كدة عايزين نحطه امام الامر الواقع بحيث بنزل يلاقيك خد القرار و دعيت ربنا يثبتك على اللى انت او انتى فيه و كدة يبقى كأنك بتطلعلوا لسانك و اظن انه يستاهل طلعوا لسلن و لسنه العيله كلها

و اوصيكم بالقرأن عايزين نتسابق مين اللى يختمه اكتر يا ريت لو كل شله يعمله مسابقه مع بعض (وفى ذلك فليتنافس المتنافسون) ياللا مش عايزة اطول عليكم و كالعادة هنزل بفاصل من الشعر بتاعى الل قرفتكوا.زاقصدى امتعتكوا بيه المرة اللى فاتت...

هاجر القرأن

ما لى؟أبعدت عنك فقد أبعدك الذنوب
أراجع الى مسامع قلبى حين أتوب
**********
يا أحرف من نور انزلت على سيد المرسلين
أنزلت رحمة بنا من رب العالمين
**********
يا مؤنسى حين يتوارى علىّ التراب
يا نورى فى قبرى و مانع عنى عذاب
**********
يكاد قلبى ينفطر فهو اليك مشتاق
ترى أذنب ما هو لألام قلبى خلاق؟
**********
أنزلت الينا بكلم عذب
تخرج من الافواه ليصبح بك اللسن رطب
ولكننا نهجرك حتى يهل رمضان
نبيت ونقوم و القلب اليك ظمأن
*********
فلما القسوة و الحجر من قلوبنا
يا ربيع قلب المؤمن عد الينا
و أرونا.....

2007-07-13T17:22:00.000-07:00

السلام عليكم, عارفين لما بيكون فى برنامج والمذيع مزنوق بيعمل ايههههههههه...بينزل فاصل انابقى مزنوقة فى الوقت شويه عشان كدة هانزلكوا فاصل هو عبارة عن بعض الابيات كتبتها ..اشعارى يعنى وهو انا عاملة المدونة دى ليه ماهو عشان اقرفكوا بابداعاتي وافكارى و كدة يعنى اتمنى ان تعجبكم هذة الابيات:D

قلب دامع..
كفاك ِ يا هموم على قلبى تدفقا

عينى على قلبي منك صارت مشفقة
*********
وها هى عينى تجود شفقة على القلب المكلوم

وها هو قلبي قلب جريح ضعيف مظلوم

ويحك يا عبراتي أستظلين هكذا تنهمرين؟

قد قرحت الجفن باتت تشكو منك العين

والنوم قد جفاني و عظم بيني وبينه الحنين

يا قلبي هون عليك لم ترىسوى بعض السنين

والملأ قالوا عن الزمان أمتلأ وفاض منه الأنين

فصبرا جميلا ولا تعجل كونك حزين
*********
ويا عينى مهلا... مهلا عبراتك... مهلا ... مهلا

رحماك بنظري و رفقا قد ضعف و يخشي العدما

قولى لقدرك بك أهلا ولربك ... حمدا.. حمدا
فبأذن الله تعالى ما صعب يصبح سهلا

**على خطى الحبيب

هلم يا مسلم على خطى الحبيب

تقول الا ان نصر الله قريب ؟!

بلى ولكنك قد بلغك المشيب

و لم تعد تخطو على خطى الحبيب

لا تقل ليت الأسلام يعود يوماِ

بل على نفسك و عزيمك الق ِ لوما

و قم وأنهض يعز الأسلام دوما

و يكن عدوه على مسه رقيب

وأ جعل منهجك هو الأسلام

لا تعش لنفسك وعش للانام

ليهل النصر و يعم السلام

قد جرح الأسلام و ينادى
مستغيثا: هل من طبيب؟

فهلم هلم على خطى الحبيب

عسى أن تكن أنت هذا الطبيب

اين رجال المحروسة!!!

2007-07-13T17:08:00.000-07:00

من هو الرجل؟ هل هو ذلك المخاوق الغليظ ؟ أم هو ذلك الشاب " الروش " المدخن .. أم أنه ذلك الأنسان غليظ الصوت.. كثير العضالات .. صديق الفتايات ؟! .
انى أرى أنه لا هذا ولا ذاك بل هو عكس كل ذلك, الرجل هو ذلك العاقل ..عزيز النفس ..قوى الأعصاب..شديد الحلم الا عندما تمس كرامته ,شرفه,عرضه .
الرجل ليس من ينفق مله على قاتله (السجائر والمخدرات ..الخ) ,
هل تعلم أن كلمة "عقل" فى اللغة تعني منع الضرر ؟
لذلك نقول أعتقل فلان ال منع عن الناس لضرره ,
( فأين اذن عقلك يا من تضر نفسك ظنا منك أن هذه هى الرجولة )
الرجل ليس من لا تهنأ ليله لم يتحدث فيها الى فتاة و انما الرجل ذلك الأمين الذى يصون أعراض الأخرين كما لو كان عرضه....
الرجل هو من يعرف ما عليه وما له ويعرف ربه و يطيعه لأن هذا يدل على عقله..
ربما تقول لا ليس بالضرورة او ليس هذا دليل,
وانا أقول لك ال بالضرورة وسوف أدلل على قولى هذا بقصة ..
تخيل لو أن هناك رجل كان جوعان و ظماان للغاية فوجد كنزا كبيرا ومليئا بالمجوهرات , بجانبه بائع أطعمة وأشربة و فى أخر الطريق هناك بائع مجوهرات فهوالأن أمامه أحد الأختيارين (الرجل)
اما أن يستبدل الكنز كله بطعام و شراب من بائع الأطعمة والاشربة الذي يشترط ذلك للبيع , أو انه يرهق نفسه قليلا ليصل لأخر الطريق فيبيع شيئا واحدا من هذا الكنز و يحتفظ بالباقي لينعم به فيما بعد ثم يذهب للبائع و يشرى ما يشتهى من طعام و شراب .
تري لو كان عاقلا ماذا يختار؟!!! هذا هو مثل الملتزم في دنياه و الغافل اللاهى .
الرجل هو من ينتفض اذا مس نساء و فتايات بلده سوءا و اذا نيل من عرضهن و شرفهن زو السؤال هنا اين هؤلاء الرجال ؟ فى المقاهى.. في الأندية مع رفيقاتهم ..أم عند باْئعى ال.....يغتصب نساء و بنات مصر كل يوم هل كان هناك ثائر..منتفض..او حتى حزين أم أن" ذكور" اليوم- وليس رجال- يقابلون سماع حوادث الاغتصاب و الأعتداءات الجنسية بقول:"يا بخته"؟!!يقولون ما عادت النساء مثل الماضى اين الست امينة وانا اقول ذهبت مع سى السيد عندما كان الرجل رجل كانت المرأة امرأة..... لو كان في الأمة رجل لقام بها... فأين رجالك يا محروسة.......

لا تعليق

2007-06-23T17:20:00.000-07:00

(:no comment في رواية أخري)

النيابة:أكتب يا ابنى..ها يا دكتورسالم بتقول أن الصحفى زكريا اسماعيل ابتزك ولفئلك او حملك مسؤلية موت المواطن فرج الاقرع اللى انت بتقول انه مات نتيجة تسمم ومش بسبب اهمالك..

الدكتور سالم: بالظبط يا فندم انا صحيح مدير المستشفى بس مش كل بلوة تحصل أبقى انا السبب,الحكاية و ما فيها اني لما كنت فى مارينا ..
يقاطعه المحقق(النيابة):مارينا؟!!وانت كنت بتعمل اية في مارينا وامتى الكلام ده؟..

الدكتور سالم: صبرك عليا ماهو دة اللي انا عايز اقوله..مانا لما كنت فى مارينا قبل الحادث بيوم شافنى الصحفى اياه وطلب منى مبلغ فانا رفضت هددنى انه هيكتب ان انا مستهتر وبسيب الدنيا تضرب تقلب في المستشفى وبعدها بيوم بالضبط جاءت الرياح بما تشتهى السفن للاستاذ مع ان المسؤل عن الحكاية دى الدكتور علاء انا ساعتها كنت قاعد كافي خيري شري فى الشالية بتاعى..

النيابة: بتاعى وكافى خيري شري ؟!! استنانى هنا يعنى بتعترف انك أهملت وكنت بتفرفش والناس بتموت وبعدين بتاعك ازاى ؟!!مدير مستشى حكومى عنده شاليه فى مارينا؟!!من أين لك هذا يا أستاذ؟!!!وادى قضيه تانية

الدكتور سالم(يتلجلج):اهه دادادا موضوع تانى انا بعترف ان انا غلطان(شوية)اما عن الشالية(يثورثورة تمليليةوينتفض لشرفه قائلا) انا لا اسمح بتاتا بالتشكيك فى زمتى
(يهدئه المحقق):طب ماتزلعلش أوي كده(بصوت خافت) كلنا لها,المهم دلوقتى خلينا في المواطن اللى مات عندكو يعنى انت بتحمل المسؤلية للدكتور علاء..

الدكتور سالم: اىنعم هو بالضبط كده

المحقق:يستدعى الدكتور علاء للتحقيق معه (يضحك الدكتور سالم للداخل ويظقطط قلبه:هيه وطلعت منها)

ويأتى الدكتور علاء للمسألة.....

المحقق: ما رأيك فى الاتهام المنسوب اليك بخصوص وفاة فرج الاقرع

الدكتور علاء : اقرع!!ما علينا يا فندم انا لما رنتلى الممرضة عشان تقولى علي المريض اياه فرج دة انا كنت فاكرها بترن كده يعنى كالعادة فمرضتش اتصل بيها
يقاطعه المحقق فى زهول:ترنلك وكالعادة؟!!!والهانم بترن لية ..حالة حرجة زى دى وبترنلك !! مستناك تتصل بيها؟!!!!!!

د. علاء: نتانة يا فندم بعيد عنك ,شفت بعنى مش دي مسؤليتها عشان تحرم بخل وبعدين انا ساكن بعيد
المحقق: ما علينا وهى كانت بترنلك ليه انت كنت فين؟
د.علاء :في البيت يا فندم
المحقق:بس انا قدامي فى جدول النوباتجيات بيقول ان وقت دخول فرج المستشفى المفروض ان دى نوباتجية سياتك يعنى المفروض انك تكون فى المستشفى مش فى البيت..

د.علاء:يا فندم.. يقاطعه وصول تقرير الطب الشرعى
المحقق: قولتلى المريض وصل المستشفى الساعة كام؟

د.علاء:تلاتة يافندم الممرضة رنتلى الساعة تلاته وعشرة وادى الموبايل تقدر حضرتك تشوف فى الميسد كولس وقت المكالمة.
المحقق:اممممممم تقرير الطبيب الشرعى بيقول انه متوفىحوالى الساعة اتنين ونص بحالة تسمم ,اذاً نتطلب الممرضة للتوصل لمن احضره للمستشفى يمكن يدلنا على اللى سمو..

د.علاء: يعنى انا براءة كدة!!!
المحقق:متفرحش اوى كدة ماتنساش انك كنت فى البيت وقت نوباتجيتك

د.علاء : انا بعترف ان انا غلطان(شوية

المحقق: قولتيلى يا نيرس عاطيات مين اللى جاب فرج؟

الممرضة: واحد يبقول انه زميله في الشغل اسمه سامى حتى كان بيبصبصلى اه والله....

المحقق:يبصبصلك وصحبه بيموت!!

الممرضة: (تضحك بدلال) هيهئ اذا كان الدكتور علاء بيبصبصلي سامى بتاع البرجر مش هيبصبصلى اصلى اتراكتف لا اقاوم..(تعتزم الاسترسال)
يقاطعها المحقق: خلاص ياختى حد قالك عليا شريف صبرى... استدعيلى بابنى سى سامى الحبيب دة
ويأتى سامي..

المحقق:احكيلى يا سامى اية اللى حصل لفرج قبل مايتعب
سامي :انا يا باشا دخلت علي فرج لقيته بياكل شندوشت بولجر (برجر)و هو خلصه من هنا ولقيته بيهوهو ويكاكى ولا لعب الاطفال يا باشا فكرته بيهزر اصله طول عمره ابن نكته وبيحب الهزار(يبكي)الله يرحمك يا فرجللو يا صاحبى , وفجأه لقيته ازرق ..جريت بيه عالمستشفى مس ملحئتوش..اة يانى ياما يانى ياما...
المحقق:افكرتوه بيهزر(ينفخ مقتربا صبره على النفاذ) أوففففففففففففففففففففففففففففففف, والسندوتش دة كله منين؟؟؟
سامي: من محل المعلم حسنى اللى كنا بنشتغل عنده
المحقق:نأمر بالكشف على صلاحية الاطعمة المتواجدة بمطعم الحاج حسنى للاطعمة الجاهزة
و بعد الكشف تأتى النتيجة بان اللحم المستخدم هو لحم كلاب.... ويستدعى المعلم حسنى

المحقق:يا معلم انت متهم بالتسبب فى تسمم فرج عبد السميع الشهير بفرج الاقرع

المعلم حسني: الل يبات مظلوم يصبح ظالم وانا كنت قولتله يسرق الاوردر بتاع الناس وياكله يا باشا دا واد حرامى ومالوش دية...
المحقق:اهههههههههههههههههه يعنى حتى المجنى عليه طلع الجانى على نفسه انتوا حتقرفونى ليه هى جت عليا انا قيد القضية يابنى ضد مجهول...........
!!!!!!!!!!!!!!!!!!!!!!!!!!!!!!!!!!!!!
ها ايه تعليقكم على مصر المحروسة؟ انا عن نفسي مش عارفة أقول ايه غير لا تعليق...
ملحوظة:هذه قصة قصيرة استنتجتها من المهاذل اللى فى مصر يعنى مش واقع.

مشروع وطن

2007-06-21T06:16:00.001-07:00

أذكر حينما كنت طالبة في المدرسة أن ثمة معلومة كنت ادرسها كل عام و فى أكثر من مادة حتى أنني بت احفظها كأسمي (مثلها كغيرها من المعلومات التي طالما درسناها واذا بحثنا عنها فى الواقع وجدنا نقيضها حادث) هذة المعلومة هى مقومات المشروع الناجح والتى هى

:
1)المادة الخام
2)رأس المال
3)الأيدى العاملة

فاذا كانت هذة هى مقومات المشروع الناجح اذن فكيف يكون مشروع وطننا مصر؟!!!

اولا المادة الخام:فنحن نصدره (احنا لسة هنصنع)

ثانيا رأس المال: نشترى به المادة الخام بعد تصنيعها(عادى فلوسنا كتييير)

ثالثا الايدى العاملة:نصدر ايضا اكفأ الايدى العامله من شبابنا و علمائنا وخبرائنا للغرب ليعلو لهم البناء , حتى ان الماهر لدينا باتت الجملة البديهية التى يقولها(والله انا خسارة في البلد دى).

نعم نحن الشعب المصرى من اطيب الشعوب الا ان هذا لا يعني ان نتبرع بكل ما نملك بشابنا,مواردناواموالنا.
ترى لماذا؟ هل لاننا كسالى..ام لاننا ادركنا اننا لا ينبغى لنا ان نعيش ..ام لأننا سأمنا كوننا اقوياء فى صفحات التاريخ فأردنا أن نجرب الضعف؟؟؟!!!!!!!!
اذا كانت هذه هى مقومات المشروع الناجح أذن فمصر لابد لها من ان تكون مشروعا فاشلا بكل المقاييس!!!
و من حق من ندفعه الى الأمام أن يدهسنا بالأقدام.......

اضحك ع الدنيا

2007-06-11T15:52:00.000-07:00

تخيل لو ان فى واحد......وقّع بينك و بين اخوك وقامت بينكو خناقة ..و اذ فجأةََ ذلك ال.....اللي وقع بينكو بيقرر هو وأصحابو ال....اللي زيوه انهم يضربوك تربية ليك عشان تحرم تضرب أخوك تانى

..
انا اعرف ان اللي يعاقبك أبوك..أمك و فى أسوء الاحوال أخوك نفسه (فى حالة أنه واطى)،او على الأقل ال...اياه ياخد رأيك انت مش أراء اصحابوا ال..حلوين!!!!!!
حقا هم يبكى و هم يضحك

هذا هو الحال بالنسبة لقرار مجلس الهلس قصدي الأمن(أسفة)بخصوص أنشاء محكمة للبت فى حادث أغتيال الحريري شوية دول لا لهم لا ناقة ولا جمل فى الحكاية يتشاوروا فى الامر و مين الدول دي؟!فرنسا,أمريكا,أيطاليا,أنجلتراو بلجيكا(ياللا ما هى زيطة).وهنا سؤال يطرح نفسه او الاصح سؤال يشد شعر نفسه

و انتوا مالكوا؟؟؟؟!!!

أما صحيح اللي أختشوا ماتوا..يقتل القتيل ويمشى في جنازته

!!!
ده كان الهم المضحك ..اما الهم المبكي هو أن الحكومة اللبنانية موافقة

يااااه للدرجة دى بقينا لعبة و ملطشة للي يسوى واللي ما يسواش(قصدي اللى يسوا ونص..نسيت ان احنا اللى مانسواش)

شامنا العريق لم يعد بعد شام
شامنا أصبح لعبة بيد اللؤام
****
يمزقهم..يدمرهم اسفل السافلين
واأسفاة عذرا يا صلاح الدين
*****
شامك القديمة اصبحت أشلاء
لم يعودوا أخوا بل أصبحوا أعداء
******
اني لأري العجب في هذا الزمان
أري قابيلا وهابيلا فى سورياولبنان

(حسبي الله و نعم الوكيل)